កាប៊ុល៖ ទូរទស្សន៍សិង្ហបុរី Channel News Asia បានផ្សព្វផ្សាយនៅថ្ងៃទី១៣ ខែធ្នូ ឆ្នាំ២០២២ថា យ៉ាងហោចណាស់មនុស្ស៣នាក់ ត្រូវបានសម្លាប់ នៅគ្រាដែលខ្មាន់កាំភ្លើង បានវាយប្រហារមកលើ សណ្ឋាគារមួយ ដែលពេញនិយមដែលមានអ្នកជំនួញ ជនជាតិចិន នៅក្នុងរដ្ឋធានីអាហ្វហ្គានីស្ថាន កាលពីថ្ងៃចន្ទ ដោយសាក្សីបានរាយការណ៍ ពីការបំផ្ទុះជាច្រើន និងការផ្ទុះអាវុធជាច្រើន ខណៈក្រុមរដ្ឋអ៊ីស្លាម ហៅកាត់ (IS) បានអះអាងទទួលខុសត្រូវពីការវាយប្រហារនេះ ។
ផ្សែងអាចត្រូវបានគេមើលឃើញថា បានភាយចេញពីសណ្ឋាគារ Kabul Longan ដែមានច្រើនជាន់ ខណៈដែលកងកម្លាំងសន្តិសុខតាលីបង់បានប្រញាប់ប្រញាល់ទៅកាន់កន្លែងនោះ ហើយត្រូវបិទជិតនៅទីនោះ។
ក្រុមតាលីបង់បានអះអាងថា មានការពង្រឹងសន្តិសុខ ចាប់តាំងពីការវាយលុកចូលកាន់អំណាចកាលពីខែសីហាឆ្នាំមុន ប៉ុន្តែមានការបំផ្ទុះគ្រាប់បែក និងការវាយប្រហារជាច្រើន ដែលភាគច្រើនត្រូវបានអះអាងដោយជំពូកក្នុងតំបន់នៃក្រុមរដ្ឋឥស្លាម។
អង្គការក្រៅរដ្ឋាភិបាលអ៊ីតាលី ឈ្មោះ Emergency NGO ដែលប្រតិបត្តិការមន្ទីរពេទ្យមួយចម្ងាយត្រឹមតែ១គីឡូម៉ែត្រពីកន្លែងបំផ្ទុះនោះ បានឲ្យដឹងថា ខ្លួនបានទទួលជនរងគ្រោះចំនួន២១នាក់ រួមទាំងមនុស្ស៣នាក់បានស្លាប់នៅពេលបញ្ជូនមកដល់ ។
អង្គការនេះមិនបាននិយាយ ថាតើ អ្នកស្លាប់ទាំងនោះជាជនស៊ីវិល ឬមានជាប់ពាក់ព័ន្ធនឹងការវាយប្រហារនោះទេ ។
អ្នកនាំពាក្យប៉ូលិសក្រុងកាប៊ុល បានលើកឡើងថា អ្នកវាយប្រហារ៣នាក់ត្រូវបានសម្លាប់ ហើយជនសង្ស័យម្នាក់ត្រូវបានចាប់ខ្លួន ។
“ភ្ញៀវទាំងអស់របស់សណ្ឋាគារត្រូវបានជួយសង្គ្រោះ ហើយមិនមានជនបរទេសណាម្នាក់ស្លាប់នោះទេ។ មានតែភ្ញៀវបរទេស២នាក់ប៉ុណ្ណោះដែលរងរបួសនៅគ្រាដែលពួកគេបានលោតចេញពីជាន់ខាងលើ” អ្នកនាំពាក្យរបស់ប្រធានក្រុមតាលីបង់ Zabiullah Mujahid បានលើកឡើងដូច្នេះនៅលើបណ្តាញសង្គម Twitter ៕
ដោយ៖ ម៉ៅ បុប្ផាមករា
