អង់ការ៉ា៖ ទីភ្នាក់ងាររដ្ឋ Anadolu បានរាយការណ៍ថា ប្រធានាធិបតីតួកគីលោក Recep Tayyip Erdogan បានឲ្យដឹងថា តួកគី អាចនឹងឆ្លើយតប “ខុសគ្នា” ចំពោះការដេញថ្លៃការចូលជាសមាជិកណាតូរបស់ហ្វាំងឡង់ ក្នុងវិធីមួយដែលនឹងធ្វើឱ្យប្រទេសស៊ុយអែត “ភ្ញាក់ផ្អើល” ។
លោក Erdogan បានឲ្យដឹងនៅក្នុងកិច្ចប្រជុំមួយនៅខេត្ត Bilecik ភាគពាយ័ព្យប្រទេសថា “យើងអាចឆ្លើយតបខុសពីហ្វាំងឡង់ ប្រសិនបើចាំបាច់។ ស៊ុយអែត នឹងភ្ញាក់ផ្អើលនៅពេលយើងឆ្លើយតបខុសពីហ្វាំងឡង់ ប៉ុន្តែហ្វាំងឡង់មិនគួរមានកំហុសដូចគ្នានោះទេ”។
លោក Erdogan បានលើកឡើងថា តួកគី បានបញ្ជូនបញ្ជីនៃ “ភេរវករ” ចំនួន ១២០នាក់ទៅប្រទេសស៊ុយអែត ដើម្បីធ្វើបត្យាប័ន។ លោក Erdogan បានលើកឡើងថា ប្រទេស Nordic ត្រូវតែធ្វើបត្យាប័នមនុស្សទាំងនេះ ដើម្បីចូលរួមជាមួយអង្គការណាតូ។
វាជាលើកទីមួយហើយដែលលោក Erdogan បានបង្ហាញថាទីក្រុងអង់ការ៉ា អាចវាយតម្លៃការផ្តល់សច្ចាប័នដល់សមាជិកភាពរបស់ស៊ុយអែត និងហ្វាំងឡង់ ជាសមាជិកណាតូ ជាមួយនឹងវិធីសាស្រ្តផ្សេងគ្នា នេះបើយោងតាមរបាយការណ៍។
តួកគី បានពន្យារពេលកិច្ចប្រជុំត្រីភាគីជាមួយស៊ុយអែត និងហ្វាំងឡង់ លើការដេញថ្លៃរបស់អង្គការណាតូ ដែលគ្រោងនឹងធ្វើឡើងនៅក្នុងខែកុម្ភៈ បន្ទាប់ពីការដុតច្បាប់ចម្លងនៃគម្ពីគូរ៉ានៅស៊ុយអែត។
ប្រទេសស៊ុយអែត និងហ្វាំងឡង់បានដាក់សំណើជាផ្លូវការដើម្បីចូលរួមជាមួយអង្គការណាតូក្នុងខែឧសភា ឆ្នាំ២០២២ ដែលត្រូវបានជំទាស់ដំបូងដោយតួកគី សមាជិកណាតូ ដោយលើកឡើងពីការគាំទ្ររបស់ពួកគេ ចំពោះអង្គការប្រឆាំងទួរគី និងអ្នកប្រឆាំងនយោបាយ៕ប្រែសម្រួល ឈូក បូរ៉ា
