វ៉ាស៊ីនតោន៖ ប្រធានាធិបតីសហរដ្ឋអាមេរិកលោក ចូ បៃដិន បានចុះហត្ថលេខាលើវិក័យប័ត្រកាលពីថ្ងៃចន្ទដើម្បីបញ្ចប់ភាពអាសន្នជាតិ នៃជំងឺកូវីដ-១៩ របស់ប្រទេសនេះ មួយខែមុនជាងរដ្ឋបាល បានគ្រោងទុក ដោយអ្នកឯកទេសខាង ជំងឺរាតត្បាតឈានមុខគេបានឲ្យដឹងថាការសម្រេចចិត្ត នេះបន្ថែមបន្ទុកដល់ប្រជាជនដែលមានបញ្ហាហិរញ្ញវត្ថុនៅក្នុងសហរដ្ឋអាមេរិក។
សេចក្តីព្រាងច្បាប់ថ្មីនេះបានបញ្ចប់ភ្លាមៗនូវភាពអាសន្នជាតិរបស់សហរដ្ឋអាមេរិកជុំវិញជំងឺកូវីដ-១៩ ដែលបានអនុម័តក្នុងអំឡុងពេលរដ្ឋបាលមុន និងបន្តតាមរយៈរដ្ឋបាលលោក បៃដិន នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ ។
អតីតប្រធានាធិបតីអាមេរិកលោក ដូណាល់ ត្រាំ បានប្រកាសភាពអាសន្នជាតិជុំវិញជំងឺកូវីដ-១៩ នៅក្នុងខែមីនា ឆ្នាំ២០២០ ដែលអនុញ្ញាតឱ្យផ្តល់មូលនិធិសហព័ន្ធដល់រដ្ឋ និងទីក្រុងសម្រាប់កិច្ចខិតខំប្រឹងប្រែងរួមទាំងការធ្វើតេស្ត ការចាក់វ៉ាក់សាំង ការព្យាបាល ក្នុងចំណោមវិធានការសង្គ្រោះបន្ទាន់ផ្សេងទៀត។
លោក Zhang Zuofeng សាស្ត្រាចារ្យ និងជាប្រធាននាយកដ្ឋានរោគរាតត្បាតនៅមន្ទីរពិសោធន៍ថា “ការផ្លាស់ប្តូរថ្មីបានប៉ះពាល់យ៉ាងខ្លាំងដល់ប្រជាជនក្រីក្រ ដោយសារវ៉ាក់សាំង ការព្យាបាល និងការធ្វើតេស្តដោយឥតគិតថ្លៃ ដែលពីមុនត្រូវបានគ្របដណ្តប់ដោយរដ្ឋាភិបាលឥឡូវនេះនឹងត្រូវបង់ដោយការធានារ៉ាប់រងសុខភាព” ។
លោក Zhang បានកត់សម្គាល់ថា “ប្រជាជនក្រីក្រជាង ៥លាននាក់នៅក្នុងសហរដ្ឋអាមេរិកនឹងបាត់បង់សិទ្ធិទទួលបាន Medicaid ដែលពួកគេបានទទួលក្នុងអំឡុងពេលរាតត្បាត” ។
គួរបញ្ជាក់ថា លោក បៃដិន បានចុះហត្ថលេខាលើវិក័យប័ត្រនេះ បន្ទាប់ពីមានការអនុម័ត ៦៨-២៣សំឡេង ដោយព្រឹទ្ធសភាសហរដ្ឋអាមេរិកនៅចុងខែមីនា និងការបោះឆ្នោត ២២០-២១០ ដោយសភាសហរដ្ឋអាមេរិកនៅចុងខែមករា៕
