បរទេស៖ រដ្ឋមន្ត្រីក្រសួងការពារជាតិ នៃប្រទេសឥណ្ឌាលោក Rajnath Singh កាលពីថ្ងៃម្សិលមិញនេះ បានធ្វើការលើកសរសើរយ៉ាងខ្លាំង ចំពោះជំនួបជាមួយនឹងសមភាគី លោករដ្ឋមន្ត្រីក្រសួងការពារជាតិរុស្សី Sergey Shoigu និងទំនាក់ទំនងរវាងប្រទេសទាំងពីរ។
យោងតាមការចេញផ្សាយរបស់ RT លោករដ្ឋមន្ត្រីក្រសួងការពារជាតិឥណ្ឌា បានធ្វើការលើកឡើងបែបនេះ នៅក្នុងពេលដែលប្រទេសឥណ្ឌា កំពុងដឹកនាំកិច្ចប្រជុំកំពូលមួយរវាង រដ្ឋមន្ត្រីក្រសួងការពារជាតិ នៃសមាជិកអង្គការ Shanghai Cooperation Organization។
រដ្ឋមន្ត្រីទាំងពីរបានពិភាក្សាគ្នា ទៅលើបញ្ហាជាច្រើនក្រៅតែពី កិច្ចសហប្រតិបត្តិការទ្វេភាគី ដែលក្នុងនោះមានទាំងវិធីសាស្ត្រ ក្នុងការជួយដល់ឧស្សាហកម្មការពារជាតិ របស់ឥណ្ឌាដោយប្រទេសរុស្សីដូចជា គំនិតផ្តួចផ្តើម Make in India ជាដើម ។
លោក Singh និងលោក Shoigu ក៏បានធ្វើការលើកឡើងរួមគ្នាផងដែរ អំពីការពេញចិត្តនិងរីករាយក្នុងការ បន្តការផ្តល់ទំនុកចិត្តរវាងគ្នារុស្សី និងឥណ្ឌាហើយទទួលស្គាល់ថា ទំនាក់ទំនងទ្វេភាគីនឹងភាពយូរអង្វែងតរៀង ទៅនិងកាន់តែល្អប្រសើរឡើងខ្លាំង ៕
ប្រែសម្រួល៖ ស៊ុន លី
