បរទេស៖ នាយករដ្ឋមន្រ្តីចាំផ្ទះរបស់ថៃ គឺ ឧត្តមសេនីយ៍ ប្រាយុទ្ធ ចាន់អូចា បានថ្លែងអំណរគុណចំពោះអ្នកបោះឆ្នោតសម្រាប់ការគាំទ្ររបស់ពួកគេ ហើយបាននិយាយថា លោកគោរពលទ្ធិប្រជាធិបតេយ្យ។
យោងតាមសារព័ត៌មាន The Nation ចេញផ្សាយនៅព្រឹកថ្ងៃទី១៥ ខែឧសភា ឆ្នាំ២០២៣ បានឱ្យដឹងថា លោក ប្រាយុទ្ធ បាននិយាយនៅម៉ោង ១០យប់កាលពីថ្ងៃអាទិត្យ ខណៈដែលវា ច្បាស់ថា គណបក្ស United Thai Nation (UTN) របស់លោកបានរង បរាជ័យយ៉ាងខ្លំាង ក្រោមកណ្តាប់ដៃរបស់គណបក្ស Move Forward និង គណបក្ស ភឿថៃ ដែលជាគណបក្សប្រឆាំង ។
លោក ប្រាយុទ្ធ បានប្តេជ្ញាបន្តបំពេញភារកិច្ចរបស់ខ្លួន ដើម្បីជាតិ សាសនា និងព្រះមហាក្សត្រពេញមួយជីវិត ស្របតាមទស្សនវិជ្ជា របស់គណបក្សរបស់លោក ។
មេដឹកនាំរដ្ឋប្រហារឆ្នាំ ២០១៤ បាននិយាយថា លោកគោរពលទ្ធិប្រជាធិបតេយ្យ និងការបោះឆ្នោត ហើយសង្ឃឹមសម្រាប់សន្តិភាព និងការអភិវឌ្ឍន៍នៅក្នុងប្រទេសថៃ។
ចំណែកមេដឹកនាំ UTN លោក Peeraphan Salirathavibhaga បានបញ្ជាក់ថា ឧត្តមសេនីយ ប្រាយុទ្ធ នឹងបន្តធ្វើជាអ្នកយុទ្ធសាស្រ្ត របស់គណបក្ស ដោយបន្ថែមថា UTN នឹងគោរពការផ្លាស់ប្តូរ អំណាចតាមបែបប្រជាធិបតេយ្យ ។ លោកបាននិយាយថា ការរំពឹងទុករបស់លោក សម្រាប់គណបក្សដែលមានអាយុពីរឆ្នាំរបស់លោកមិនមានខ្ពស់ ក្នុងការឈានទៅបោះឆ្នោតនោះទេ ។
លោកថា យើងមិនបានរំពឹងទុកអ្វីនោះទេ។ យើងគ្រាន់តែចង់ឲ្យបេក្ខជនតំណាងរាស្ត្រមណ្ឌលរបស់យើងទាំងអស់ប្រឹងប្រែងជាអតិបរមា»៕
ប្រែសម្រួលៈ ណៃ តុលា
