បរទេស៖ មនុស្សជាងមួយលាននាក់ បានចុះហត្ថលេខាលើញត្តិមួយ ដោយអំពាវនាវឱ្យប៉ូលីសក្រុង “ទទួលខុសត្រូវព្រហ្មទណ្ឌ” បន្ទាប់ពីសត្វឆ្កែពីរក្បាលត្រូវបាន ប៉ូលិសបាញ់សម្លាប់នៅចំពោះមុខសាក្សីដែលស្រែក។
យោងតាមសារព័ត៌មាន THE INDEPENDENT ចេញផ្សាយកាលពីថ្ងៃទី២១ ខែឧសភា ឆ្នាំ២០២៣ បានឱ្យដឹងថា វីដេអូនៅលើប្រព័ន្ធផ្សព្វផ្សាយសង្គមកាលពីដើមខែនេះ បានបង្ហាញឲ្យឃើញពីក្រុមមន្ត្រីដែលកំពុងតាមចាប់បុរសម្នាក់ ដែលកំពុងបណ្តើរឆ្កែនៅតាមដងផ្លូវប្រឡាយក្នុងទីក្រុង Tower Hamlets ភាគខាងកើតទីក្រុងឡុងដ៍ បន្ទាប់ពីមានសេចក្តីរាយការណ៍ថា សត្វចិញ្ចឹមមួយក្បាលបានវាយប្រហារស្ត្រីម្នាក់ នៅក្បែរនោះ។
ពេលនោះស្ថានភាពកាន់តែក្តៅគគុក មុនពេលបុរសនោះត្រូវបានចាប់ផ្តួលទៅនឹងដី ហើយសត្វត្រូវបាញ់សម្លាប់។ ម្ចាស់ឆ្កែត្រូវបានចោទប្រកាន់ពីបទទទួលខុសត្រូវលើឆ្កែដែលគ្មានការគ្រប់គ្រងដ៏គ្រោះថ្នាក់។
ប៉ូលិសក្រុង បាននិយាយការពារសកម្មភាពរបស់ខ្លួន ដោយនិយាយថា មន្ត្រីប៉ូលីស “មានកាតព្វកិច្ចធ្វើសកម្មភាពក្នុងករណីចាំបាច់ មុនពេលមានរបួសបន្ថែមទៀត”។
ញត្តិដែលបានបង្កើតឡើងដោយអំពាវនាវឲ្យមានការទទួលខុសត្រូវ ដោយឧក្រិដ្ឋកម្មចំពោះការស្លាប់របស់សត្វសុនខឥឡូវនេះ បានទទួលហត្ថលេខាមួយលានហើយ។
មនុស្សជាង ១លាននាក់នបានចុះហត្ថលេខាលើញត្តិ Change.org នៅរសៀលថ្ងៃសៅរ៍ ជាមួយនឹងគោលដៅចំនួន ១,៥លាននាក់ដែលកំណត់ដោយអ្នករៀបចំ ដែលបានវាយលុកទៅលើអ្វីដែលពួកគេបានពិពណ៌នាថាជា “ការសម្លាប់ព្រៃផ្សៃ” ទៅលើសត្វ។
សកម្មជនសិទ្ធិសត្វរាប់រយនាក់បានប្រមូលផ្តុំគ្នា នៅខាងក្រៅស្នាក់ការប៉ូលីស New Scotland Yard នៅលើផ្លូវ Westminster Embankment កាលពីថ្ងៃទី១១ ឧសភា ដើម្បីតវ៉ាប្រឆាំងនឹងការបាញ់សម្លាប់ឆ្កែនេះ។
ក្រុមឃ្លាំមើលរបស់ប៉ូលិសមុននេះបាននិយាយថា ខ្លួននឹងបើកការស៊ើបអង្កេតបន្ទាប់ពីឧបទ្ទវហេតុនេះកើតឡើង។
ការិយាល័យឯករាជ្យសម្រាប់ការប្រព្រឹត្តរបស់ប៉ូលីស (IOPC) បាននិយាយថា វា “សមរម្យ” ដែលពាក្យបណ្តឹងដែលទាក់ទងនឹងឧប្បត្តិហេតុនៅថ្ងៃទី៧ ឧសភា គួរតែត្រូវបាន “ស៊ើបអង្កេតដោយឯករាជ្យ” ហើយបានបន្ថែមថាខ្លួនយល់ពីការព្រួយបារម្ភដែលបណ្ដាលមកពីការបាញ់ប្រហារនេះ៕
ប្រែសម្រួលៈ ណៃ តុលា
