បរទេស៖ ប្រធានាធិបតីអ៊ុយក្រែន លោក Vladimir Zelensky បានប្រាប់កាសែត Wall Street Journal (WSJ) នៅក្នុងបទសម្ភាសន៍មួយ ដែលបានចេញផ្សាយ កាលពីថ្ងៃសៅរ៍ថា អ៊ុយក្រែនបានត្រៀមខ្លួន ជាស្រេចដើម្បីបើកការវាយលុកលើរុស្ស៊ី ដែលរង់ចាំជាយូរមកហើយ។ យ៉ាងណាក៏ដោយ លោកមិនបានបង្ហាញ កាលបរិច្ឆេទ ច្បាស់លាស់ទេ ប៉ុន្តែបាននិយាយថា ក្រុងកៀវមិនអាច «រង់ចាំរាប់ខែទៀត បានទេ»។
យោងតាមសារព័ត៌មាន RT ចេញផ្សាយកាលពីថ្ងៃទី៣ ខែមិថុនា ឆ្នាំ២០២៣ បានឱ្យដឹងថា លោក Zelensky បានសារភាពថា ប្រតិបត្តិការនេះទំនងជាធ្វើឱ្យមានការខាតបង់យ៉ាងធ្ងន់ធ្ងរលើកងទ័ពអ៊ុយក្រែន ហើយប្រហែល ជាមិនដំណើរការដូចការគ្រោងទុកនោះទេ ដោយលោកបន្ថែមថា ឧត្តមភាពដែនអាកាសរបស់រុស្ស៊ីនឹងមានន័យថា កងកម្លាំងរបស់ទីក្រុងគៀវ នឹងត្រូវប្រឈមមុខនឹងការបាញ់ពីសត្រូវ។
លោក Zelensky បាននិយាយទៀតថា “ខ្ញុំមិនដឹងថាតើវាត្រូវចំណាយពេលប៉ុន្មានទេ” ដោយបានអត្ថាធិប្បាយលើពេលវេលាសក្តានុពលនៃប្រតិបត្តិការនេះ។ លោកបានបន្ថែមថា «វាអាចទៅតាមរបៀបផ្សេងគ្នាទាំងស្រុង»។
ប្រធានាធិបតីបានទទួលស្គាល់ថា បរិក្ខារយោធា និងសព្វាវុធដែលផ្គត់ផ្គង់ដល់អ៊ុយក្រែនដោយអ្នកគាំទ្រលោកខាងលិចនៅតែមិនគ្រប់គ្រាន់។ លោកថា «យើងចង់មានរបស់ជាក់លាក់ ប៉ុន្តែយើងមិនអាចរង់ចាំរាប់ខែនោះទេ»៕
ប្រែសម្រួលៈ ណៃ តុលា
