ប្រធានាធិបតីអ៊ុយក្រែនថា វិទ្យុសកម្ម វាមិនសួរថា អ្នកណាអព្យាក្រឹតនោះទេ បន្ទាប់ពីដឹងថា រុស្ស៊ីអាចវាយប្រហារលើរោងចក្រថាមពល នុយក្លេអ៊ែរ របស់ខ្លួន

បរទេស៖ ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃព្រហស្បតិ៍ថា លោកជឿជាក់ថា ប្រទេសរុស្ស៊ី អាចនឹងរៀបចំសម្រាប់ការវាយប្រហារ លើរោងចក្រថាមពលនុយក្លេអ៊ែរ របស់ប្រទេសអ៊ុយក្រែន ដែលជារោងចក្រនុយក្លេអ៊ែរ ដ៏ធំបំផុតរបស់អឺរ៉ុប។

យោងតាមសារព័ត៌មាន VOA ចេញផ្សាយនៅថ្ងៃទី២៣ ខែមិថុនា ឆ្នាំ២០២៣ បានឱ្យដឹងថា លោកប្រធានាធិបតី Volodymyr Zelenskyy បាននិយាយនៅក្នុងសុន្ទរកថាប្រចាំថ្ងៃរបស់លោកថា “ការឈប់កាន់កាប់ពេញលេញនៃ Zaporizhzhia NPP គឺជាកត្តាចាំបាច់” ។ អ្នកណាក៏ដោយដែលមើលមិនឃើញចំពោះការកាន់កាប់របស់រុស្សីលើកន្លែងបែបនេះ ចំពោះការជីកយករ៉ែរបស់រុស្ស៊ីលើទឹកដី និងកន្លែងរោងចក្រថាមពលនុយក្លេអ៊ែរ គឺជាការរួមចំណែកមិនត្រឹមតែដល់អំពើអាក្រក់របស់រុស្ស៊ីនេះប៉ុណ្ណោះទេ ថែមទាំងធ្វើឱ្យមានការភ័យខ្លាចជាទូទៅផងដែរ។”

លោក Zelenskyy បានព្រមានអំពីផលវិបាកធ្ងន់ធ្ងរនៃការវាយប្រហារបែបនេះ។ មេដឹកនាំអ៊ុយក្រែនរូបនេះ បាននិយាយថា “ជាក់ស្តែង វិទ្យុសកម្មមិនសួរថាអ្នកណាអព្យាក្រឹត ហើយវាអាចទៅដល់មនុស្សគ្រប់គ្នាក្នុងពិភពលោកនេះ”។

ចំណែកមន្ត្រីរុស្ស៊ីវិញបាននិយាយកាលពីថ្ងៃព្រហស្បតិ៍ថា ការវាយប្រហារតាមផ្លូវអាកាសពេញមួយយប់ដោយកងកម្លាំងអ៊ុយក្រែនបានបំផ្លាញស្ពានតភ្ជាប់ឧបទ្វីបគ្រីមៀទៅកាន់តំបន់ Kherson ភាគខាងត្បូងអ៊ុយក្រែន។

ស្ពាន Chongar គឺជាផ្លូវមួយក្នុងចំណោមផ្លូវមួយចំនួនដែលកងកម្លាំងរុស្ស៊ីប្រើដើម្បីផ្លាស់ទីរវាងតំបន់គ្រីមៀ និងផ្នែកផ្សេងទៀតនៃអ៊ុយក្រែន ក្រោមការគ្រប់គ្រងរបស់រុស្ស៊ី។ រុស្ស៊ីបានកាន់កាប់តំបន់គ្រីមៀចាប់តាំងពីបានបញ្ចូលវាក្នុងឆ្នាំ ២០១៤ ក្នុងចំណាត់ការមួយដែលសហគមន៍អន្តរជាតិភាគច្រើនបដិសេធ៕

ប្រែសម្រួលៈ ណៃ តុលា