ញូវយ៉ក ៖ តម្លៃប្រេងឆៅនាពេលអនាគត បានបង្ហាញពីការ កើនឡើងតិចតួច ខណៈដែលអ្នកចូលរួមទីផ្សារ បានងាកទៅចាប់អារម្មណ៍ លើភាពតានតឹងផ្នែកយោធា នៅក្នុងប្រទេសរុស្ស៊ី នេះបើយោងតាមការចុះផ្សាយ របស់ទីភ្នាក់ងារសារ ព័ត៌មានចិនស៊ិនហួ។
West Texas Intermediate (WTI) សម្រាប់ការចែកចាយខែសីហា បានកើនឡើង ០,២១ ដុល្លារអាមេរិក ឬ ០,៣០ភាគរយ មកនៅ ៦៩,៣៧ ដុល្លារក្នុងមួយបារ៉ែល នៅលើផ្សារហ៊ុន New York Mercantile Exchange។
ប្រេងឆៅប្រភេទ Brent សម្រាប់ចែកចាយនៅខែសីហា បានកើនឡើង ០,៣៣ ដុល្លារ ឬ ០,៤៥ ភាគរយ មកនៅតម្លៃ ៧៤,១៨ ដុល្លារក្នុងមួយបារ៉ែល នៅលើផ្សារហ៊ុន London ICE Futures Exchange។
លោក Vladimir Zernov អ្នកវិភាគនិងអ្នកផ្គត់ផ្គង់ព័ត៌មានទីផ្សារ FX Empire បានឲ្យដឹងថា “ប្រេង WTI ទទួលបានដីខ្លះនៅពេលពាណិជ្ជករមានប្រតិកម្ម ចំពោះភាពចលាចលនាពេលថ្មីៗនេះ នៅក្នុងប្រទេសរុស្ស៊ី ។ ការនាំចេញប្រេងរបស់រុស្ស៊ី មិនត្រូវបានប៉ះពាល់នោះទេ ហើយស្ថានភាពមានស្ថេរភាព យ៉ាងឆាប់រហ័ស ប៉ុន្តែអារម្មណ៍ទីផ្សារ នៅតែមានសុទិដ្ឋិនិយម”។
កាលពីចុងសប្តាហ៍កន្លងទៅ គណៈកម្មាធិការជាតិ ប្រឆាំងភេរវកម្មរបស់រុស្ស៊ី បានប្រកាសថា របបប្រតិបត្តិការប្រឆាំង ភេរវកម្មត្រូវបានណែនាំ នៅជុំវិញទីក្រុងមូស្គូ និងក្នុងតំបន់ Voronezh ដើម្បីការពារសកម្មភាពភេរវករ ដែលអាចកើតមាន បន្ទាប់ពីលោក Yevgeny Prigozhin ដែលជាប្រធានក្រុមយោធាឯកជន Wagner របស់រុស្ស៊ី ត្រូវបានចោទប្រកាន់ពីបទប៉ុនប៉ង ដើម្បីបើកការបះបោរប្រដាប់អាវុធ។
កាលពីល្ងាចថ្ងៃសៅរ៍ ទីក្រុងម៉ូស្គូ និងលោក Prigozhin បានឈានដល់ការសម្រុះសម្រួលមួយ បន្ទាប់ពីកិច្ចខិតខំប្រឹងប្រែងសម្រុះសម្រួលដោយប្រធានាធិបតីបេឡារុស្សលោក Alexander Lukashenko ។
នៅក្នុងកំណត់ត្រាស្រាវជ្រាវមួយ កាលពីថ្ងៃចន្ទបានឲ្យដឹងថា ស្ថានភាពនៅក្នុងប្រទេសរុស្ស៊ី នៅតែជាការរំលឹកដ៏សំខាន់ដល់អ្នកវិនិយោគថា “សង្រ្គាមដែលមិនអាចទាយទុកជាមុន បានកំពុងបន្ត ហើយហានិភ័យភូមិសាស្ត្រ នយោបាយ ត្រូវបានកើនឡើង នៅពេលដែលពួកគេមិនមែន ជាចំណុចកណ្តាល នៃការយកចិត្តទុកដាក់ទីផ្សារ” ៕
