ប៉េកាំង៖ បេសកជនចិន បានឲ្យដឹងថា ជំនួយមនុស្សធម៌ដល់ប្រទេសស៊ីរី គួរតែត្រូវបានផ្តល់តាមរបៀបមួយ ដែលគោរពអធិបតេយ្យភាពរបស់ប្រទេស នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ការអនុញ្ញាត នៃការផ្តល់ជំនួយឆ្លងព្រំដែនទៅកាន់ប្រទេសស៊ីរី បានផុតកំណត់កាលពីថ្ងៃចន្ទ ហើយក្រុមប្រឹក្សាសន្តិសុខអង្គការសហប្រជាជាតិ បានបរាជ័យកាលពីថ្ងៃអង្គារក្នុងការអនុម័ត សេចក្តីព្រាងដំណោះស្រាយណាមួយក្នុងចំណោមពីរ ដែលនឹងធ្វើឱ្យយន្តការនេះបន្ត។
រុស្ស៊ីបានវេតូលើសេចក្តីព្រាងសេចក្តីសម្រេចដែលដាក់ដោយប្រេស៊ីល និងស្វីស ដែលបានអំពាវនាវឲ្យមានការអនុញ្ញាតឡើងវិញរយៈពេល ៩ ខែ។
សេចក្តីព្រាងសេចក្តីសម្រេចរបស់រុស្ស៊ី ដែលនឹងបន្តយន្តការរយៈពេល ៦ខែនោះ បានបរាជ័យក្នុងការទទួលបានចំនួនសន្លឹកឆ្នោត ដែលត្រូវការសម្រាប់ការអនុម័ត។
នៅក្នុងការពន្យល់អំពីការបោះឆ្នោត លោក Zhang Jun តំណាងអចិន្ត្រៃយ៍របស់ចិន ប្រចាំអង្គការសហប្រជាជាតិ បានឲ្យដឹងថា ប្រទេសចិន មានការសោកស្តាយ ចំពោះការបរាជ័យរបស់ក្រុមប្រឹក្សាសន្តិសុខក្នុងការឈានដល់ការឯកភាពគ្នាលើបញ្ហាដ៏សំខាន់នេះ។
លោកបានបន្តថា “ជំហររបស់ចិនលើបញ្ហាមនុស្សធម៌នៅស៊ីរីបានជាប់លាប់និងច្បាស់លាស់ យើងទាំងអស់គ្នាបានរក្សាថា ជំនួយមនុស្សធម៌ដល់ប្រទេសស៊ីរី គួរតែត្រូវបានផ្តល់ជូនក្នុងរបៀបមួយ ដែលគោរពអធិបតេយ្យភាពរបស់ប្រទេសស៊ីរី និងកម្មសិទ្ធិរបស់រដ្ឋាភិបាលស៊ីរី”។
ជំនួយសង្គ្រោះឆ្លងកាត់គួរតែក្លាយជាទម្រង់ចម្បង សម្រាប់ជំនួយមនុស្សធម៌ដល់ស៊ីរី។ លោកបានលើកឡើងថា យន្តការផ្តល់ជំនួយឆ្លងកាត់ព្រំដែន គឺជាការរៀបចំបណ្តោះអាសន្ន ដែលធ្វើឡើងក្នុងកាលៈទេសៈជាក់លាក់ ហើយចាំបាច់ត្រូវពន្លឿនការផ្លាស់ប្តូរទៅរកជំនួយឆ្លងព្រំដែន និងដើម្បីបញ្ចប់យន្តការឆ្លងព្រំដែនតាមពេលវេលារហូតដល់គោលដៅចុងក្រោយ៕ ប្រែសម្រួល ឈូក បូរ៉ា
