បរទេស៖ ឆ្មាំសមុទ្របាននិយាយថា អគ្គីភ័យបានឆាបឆេះនៅលើកប៉ាល់ដឹកទំនិញដឹករថយន្តជិត ៣ ០០០ គ្រឿង នៅឆ្នេរសមុទ្រហូឡង់ កាលពីថ្ងៃពុធ ដោយបានសម្លាប់សមាជិកនាវិកម្នាក់ និងជាច្រើននាក់ទៀតរងរបួស។
យោងតាមសារព័ត៌មាន រ៉យទ័រ ចេញផ្សាយនៅថ្ងៃទី២៧ ខែកក្កដា ឆ្នាំ២០២៣ បានឱ្យដឹងថា សមាជិកនាវិកជាច្រើននាក់ត្រូវបង្ខំលោតពីលើកប៉ាល់នោះ បន្ទាប់ពីភ្លើងបានចាប់ផ្តើមឆេះកាលពីយប់ថ្ងៃអង្គារនៅលើកប៉ាល់ Fremantle Highway ដែលចុះបញ្ជីដោយប្រទេសប៉ាណាម៉ា ប្រវែង ១៩៩ ម៉ែត្រ ខណៈដែលកំពុងធ្វើដំណើរពីប្រទេសអាល្លឺម៉ង់ទៅកាន់ប្រទេសអេហ្ស៊ីប។
ស្ថានទូតឥណ្ឌាប្រចាំប្រទេសហូឡង់ បាននិយាយនៅក្នុងប្រព័ន្ធផ្សព្វផ្សាយសង្គមថា អគ្គិភ័យបាន “បណ្តាលឱ្យអ្នកដើរតាមសមុទ្រជាជនជាតិឥណ្ឌាម្នាក់ស្លាប់ និងរបួសដល់នាវិកជាច្រើននាក់” ។ លោក Shoei Kisen ជនជាតិជប៉ុន ដែលជាម្ចាស់កប៉ាល់ បាននិយាយថា នាវិកទាំងអស់មាន ២១ នាក់ គឺជាជនជាតិឥណ្ឌា។
ឆ្មាំឆ្នេរសមុទ្រហូឡង់បាននិយាយថា កប៉ាល់ជួយសង្គ្រោះបានបាញ់ទឹកទៅលើកប៉ាល់ដែលកំពុងឆេះ ប៉ុន្តែការប្រើទឹកច្រើនពេកបានប្រថុយនឹងការលិចកប៉ាល់, វាត្រូវបានភ្ជាប់ទៅនឹងកប៉ាល់សង្គ្រោះដើម្បីការពារកុំឱ្យវារសាត់។
ទីភ្នាក់ងារសារព័ត៌មានហូឡង់ ANP បានរាយការណ៍ដោយដកស្រង់សម្តីឆ្មាំឆ្នេរសមុទ្រថា ភ្លើងឆេះអាចមានរយៈពេលជាច្រើនថ្ងៃ។ ផ្សែងបានបន្តហុយចេញពីកប៉ាល់នៅជិតកោះ Ameland ភាគខាងជើងនៃប្រទេសហូឡង់។
លោក Edwin Versteeg អ្នកនាំពាក្យនាយកដ្ឋានផ្លូវទឹក និងសាធារណៈការរបស់ប្រទេសហូឡង់ បាននិយាយថា “ភ្លើងនៅតែមិនអាចគ្រប់គ្រងបាន។ វាជាជាការឆាបឆេះដ៏លំបាកក្នុងការពន្លត់ ប្រហែលជាដោយសារតែទំនិញដែលកប៉ាល់កំពុងដឹកជញ្ជូន” ៕ ប្រែសម្រួលៈ ណៃ តុលា
