ឡុងដ៌៖ ទីភ្នាក់ងារព័ត៌មាន Reuters បានរាយការណ៍ថា សហរដ្ឋអាមេរិក កំពុងប្រឈមមុខនឹងការកើនឡើងដ៏ធំបំផុត និងជានិរន្តរភាពបំផុតនៃអំពើហិង្សានយោបាយចាប់តាំងពីទសវត្សរ៍ឆ្នាំ១៩៧០។
របាយការណ៍នេះបានកំណត់ករណីអំពើហិង្សាផ្នែកនយោបាយចំនួន ២១៣ ករណី ចាប់តាំងពីការវាយប្រហារកាលពីថ្ងៃទី០៦ ខែមករា ឆ្នាំ២០២១ ដោយអ្នកគាំទ្រអតីតប្រធានាធិបតីលោក ដូណាល់ ត្រាំ លើវិមានកាពីតូល របស់សហរដ្ឋអាមេរិក ដោយដកស្រង់សម្តីអ្នកសិក្សា ៣រូប ដែលបានពិនិត្យករណីនេះដោយលើកឡើងថាពួកគេបានបន្ថែមភស្តុតាង ដែលកើនឡើងថាអំពើហិង្សានយោបាយ គឺអាក្រក់បំផុតចាប់តាំងពី ឆ្នាំ១៩៧០ ។
ប្រហែលពីរភាគបីនៃឧប្បត្តិហេតុហឹង្សានយោបាយដែលចងក្រងដោយ Reuters គឺជាការវាយប្រហារដោយអ្នកវាយប្រហារឯកកោ ឬការប៉ះទង្គិចគ្នារវាងក្រុមគូប្រជែងក្នុងព្រឹត្តិការណ៍សាធារណៈ ដូចជាបាតុកម្មជុំវិញការសម្លាប់ប៉ូលិស ការរំលូតកូន និងសិទ្ធិប្តូរភេទ។ នៅសល់ពាក់ព័ន្ធនឹងការខូចខាតទ្រព្យសម្បត្តិយ៉ាងច្រើន។
នៅដើមទសវត្សរ៍ឆ្នាំ១៩៧០ អំពើហឹង្សានយោបាយរបស់អាមេរិក ត្រូវបានប្រព្រឹត្តឡើងជាញឹកញាប់ដោយពួករ៉ាឌីកាល់នៅខាងឆ្វេង ហើយផ្តោតលើការបំផ្លាញទ្រព្យសម្បត្តិ ដូចជាអគាររដ្ឋាភិបាលជាដើម របាយការណ៍នេះបានដកស្រង់សម្តីលោក Rachel Kleinfeld ដែលសិក្សាអំពីជម្លោះនយោបាយ និងលទ្ធិជ្រុលនិយមនៅ Carnegie Endowment for International Peace ដែលជាអ្នកគិតរបស់ទីក្រុងវ៉ាស៊ីនតោន។
ប្រភពបានឲ្យដឹងថា ផ្ទុយទៅវិញ ភាគច្រើននៃអំពើហិង្សានយោបាយនាពេលបច្ចុប្បន្ននេះ គឺសំដៅលើមនុស្ស ហើយភាគច្រើន នៃការផ្ទុះដ៏សាហាវដែលតាមដានដោយ Reuters បានមកពីខាងស្ដាំ។
ក្នុងចំណោមការវាយប្រហារនយោបាយដ៏សាហាវចំនួន ១៤លើក ចាប់តាំងពីកុប្បកម្មកាពីតូល ដែលជនល្មើស ឬជនសង្ស័យមានបក្សពួកច្បាស់លាស់ មាន ១៣នាក់ ជាអ្នកវាយប្រហារស្តាំនិយម៕ ប្រែសម្រួល ឈូក បូរ៉ា
