បរទេស ៖ នាយករដ្ឋមន្ត្រីថៃ លោក ស្រែថា ថាវីស៊ីន កាលពីម្សិលមិញបានថ្លែងអំណរ គុណដល់នាយករដ្ឋមន្ត្រី ជិតផុតអាណត្តិលោក ប្រាយុទ្ធ ចាន់អូចា ដែលបានពន្យារពេលជ្រើសរើស មេប៉ូលិសថ្មី រហូតដល់កាប្រគល់តំណែង ដល់រដ្ឋាភិបាលថ្មីជាផ្លូវការ ដើម្បីភាពសមស្រប។
យោងតាមសារព័ត៌មាន Bangkok Post ចេញផ្សាយនៅថ្ងៃទី២៦ ខែសីហា ឆ្នាំ២០២៣ បានឱ្យដឹងដោយផ្អែកតាមការលើកឡើងរបស់លោក ស្រែថា ដែលបាននិយាយថា “ខ្ញុំត្រូវតែអរគុណលោកឧត្តមសេនីយ៍ ប្រាយុទ្ធ ដែលបាន ផ្តល់កិត្តិយសដល់ខ្ញុំ” ហើយថា ស្នងការនគរបាលក្រោម រដ្ឋាភិបាលថ្មីនឹងកោះប្រជុំ ដើម្បីជ្រើសរើសមេប៉ូលីសថ្មី បន្ទាប់ពីការស្បថ ចូលកាន់តំណែងសមាជិកគណៈរដ្ឋមន្ត្រីថ្មី។
លោក ស្រែថា បាននិយាយជុំវិញបញ្ហានេះ បន្ទាប់ពីបានដឹងពី ការជ្រើសរើសមេប៉ូលិសថ្មីត្រូវបានពន្យារពេល។
អ្នកនាំពាក្យប៉ូលិសភូមិន្ទថៃ (RTP) លោកឧត្តមសេនីយ៍ Achayon Kraithong បាននិយាយថា ការសម្រេចចិត្តនេះ ត្រូវបានធ្វើឡើងក្នុងអំឡុង ពេលកិច្ចប្រជុំ នៃគណៈកម្មការប៉ូលីស ដែលដឹកនាំដោយលោកឧត្តមសេនីយ៍ ប្រាយុទ្ធ នៅទីស្នាក់ការ កណ្តាលរបស់ RT កាលពីម្សិលមិញ។
របៀបវារៈនេះ រួមមានការជ្រើសរើសអគ្គស្នងការ RT ថ្មី ដើម្បីជំនួស ឧត្តមសេនីយ៍ឯក Damrongsak Kittiprapas ដែលនឹងចូលនិវត្តន៍នៅចុងខែកញ្ញា។ កិច្ចប្រជុំក៏បានពិភាក្សា អំពីការជ្រើសរើសស្នងការរងនគរបាល អគ្គស្នងការនគរបាល និងមេបញ្ជាការគ្រប់កងពលនគរបាល៕
ប្រែសម្រួលៈ ណៃ តុលា
