ធ្លាក់ឧទ្ធម្ភាគចក្រនៅជិតទីក្រុង ឌូបៃ ស្លាប់ពិឡុតម្នាក់ និងម្នាក់ទៀត កំពុងបាត់ខ្លួន

បរទេស៖ និយតករអាកាសចរណ៍របស់ប្រទេសអារ៉ាប់រួម បាននិយាយថា អ្នកបើកយន្តហោះម្នាក់បានស្លាប់ នៅក្នុងការធ្លាក់ឧទ្ធម្ភាគចក្រនៅឯឆ្នេរសមុទ្រ នៃប្រទេស អារ៉ាប់រួម (UAE) ដោយកត់សម្គាល់ថា ក្រុមជួយសង្គ្រោះកំពុងស្ថិតនៅក្នុងតំបន់ដើម្បីស្វែងរក ប្រតិបត្តិករទីពីរបន្ទាប់ពីបានរកឃើញកំទេចកំទីពីយន្តហោះ។

យោងតាមសារព័ត៌មាន RT ចេញផ្សាយនៅថ្ងៃទី៩ ខែកញ្ញា ឆ្នាំ២០២៣ បានឱ្យដឹងថា ការធ្លាក់នេះបានកើតឡើងកាលពីយប់ថ្ងៃព្រហស្បតិ៍ នៅក្នុងដែនទឹកក្បែរទីក្រុងឆ្នេរសមុទ្រ Umm Al Quwain ភាគខាងជើងនៃទីក្រុងឌូបៃ មិនយូរប៉ុន្មានបន្ទាប់ពីឧទ្ធម្ភាគចក្រ Bell 212 បានហោះចេញពីអាកាសយានដ្ឋានអន្តរជាតិ Al Maktoum របស់ទីក្រុង, នេះបើយោងតាមអាជ្ញាធរអាកាសចរណ៍ទូទៅ។

ក្រុមមន្ត្រីបាននិយាយកាលពីថ្ងៃសុក្រថា “ក្រុមស្វែងរក និងជួយសង្គ្រោះបានរកឃើញបំណែករបស់ឧទ្ធម្ភាគចក្រ ដោយបន្ថែមថា ក្រុមអ្នកជួយសង្គ្រោះកំពុងរុករកកន្លែងធ្លាក់ ហើយថា “ការស្វែងរកកំពុងដំណើរការ រកអ្នកបើកបរដែលបាត់ខ្លួនម្នាក់ទៀត”៕​​ ប្រែសម្រួលៈ ណៃ តុលា