ដាម៉ាស់៖ ក្រសួងសុខាភិបាលស៊ីរីបានឲ្យដឹងថា ការវាយប្រហារដោយយន្តហោះដ្រូនលើបណ្ឌិតសភាយោធាក្នុងខេត្ត Homs ភាគកណ្តាលប្រទេសស៊ីរីកាលពីថ្ងៃព្រហស្បតិ៍បានឆក់យកជីវិតមនុស្សជាង ៨០ នាក់ និងបានបណ្តាលឲ្យ ២៤០ នាក់ផ្សេងទៀតរងរបួស។
រដ្ឋមន្ត្រីសុខាភិបាលស៊ីរី លោក Hassan al-Ghabbash បានប្រកាសនៅល្ងាចថ្ងៃព្រហស្បតិ៍ម្សិលមិញនេះថា ចំនួនអ្នកស្លាប់ និងរបួសនៅតែជាបណ្តោះអាសន្ន ដោយកុមារចំនួន ៦ នាក់ និងស្ត្រី ៦ នាក់បានរងរបួសយ៉ាងធ្ងន់ធ្ងរ។
ឧបទ្ទវហេតុនេះបានកើតឡើងបន្ទាប់ពីពិធីប្រគល់សញ្ញាបត្រដល់មន្ត្រីយោធាស៊ីរីនៅបណ្ឌិតសភាយោធានៅទីក្រុង Homs នេះបើយោងតាមលារចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ទន្ទឹមនឹងនោះ ក្រុមសង្កេតការណ៍សិទ្ធិមនុស្សស៊ីរី បានបង្ហាញចំនួនអ្នកស្លាប់ច្រើនជាង ១១២នាក់ ក្នុងនោះមានជនស៊ីវិល ១៤នាក់។
ក្រុមឃ្លាំមើលដែលមានមូលដ្ឋាននៅចក្រភពអង់គ្លេស បានកត់សម្គាល់វត្តមានរបស់រដ្ឋមន្ត្រីការពារជាតិស៊ីរី នៅក្នុងពិធីដែលបានចាកចេញមុនពេលការវាយប្រហារ។
យោធាស៊ីរី បានបដិសេធមិនដាក់ឈ្មោះពិរុទ្ធជនឲ្យបានច្បាស់លាស់ ប៉ុន្តែបានចាត់ទុកពួកគេថាជា “ក្រុមភេរវករដែលគាំទ្រដោយភាគីអន្តរជាតិដែលគេស្គាល់” ហើយបានប្តេជ្ញាថា នឹងផ្តល់ការឆ្លើយតបយ៉ាងម៉ឺងម៉ាត់៕ ប្រែសម្រួល ឈូក បូរ៉ា
