បាងកក៖ ទីភ្នាក់ងារចិនស៊ិនហួចេញផ្សាយនៅថ្ងៃនេះបានឲ្យដឹងថា ឪពុកម្តាយរបស់យុវជនអាយុ១៤ឆ្នាំដែលជាជនឧក្រិដ្ឋក្នុងការបាញ់ប្រហារនៅផ្សារទំនើបមួយកន្លែងកាលពីប៉ុន្មានថ្ងៃមុននោះបានចេញមកធ្វើការថ្លែងសុំទោសជាសាធារណៈហើយកាលពីថ្ងៃសុក្រម្សិលមិញ។
នៅក្នុងសេចក្តីថ្លែងការណ៍នោះ ពួកគេបាននិយាយថា៖យើងខ្ញុំសូមអភ័យទោសយ៉ាងជ្រាលជ្រៅចំពោះជនរងគ្រោះ ក្រុមគ្រួសារនៃអ្នកស្លាប់ និងអ្នករងរបួសពីឧប្បត្តិហេតុបាញ់ប្រហារនាពេលថ្មីៗនេះ ដែលបានកើតឡើងជាលទ្ធផលនៃសកម្មភាពរបស់កូនប្រុសយើងនៅផ្សារទំនើប Siam Paragon ។
រំលឹកថាជនសង្ស័យបានបើកការបាញ់ប្រហារនៅផ្សារទំនើបក្រុងបាងកកដ៏ល្បីមួយកាលពីថ្ងៃអង្គារ ដោយបានសម្លាប់មនុស្សពីរនាក់ និង៥នាក់ផ្សេងទៀតរងរបួស។ ស្ថានទូតចិនប្រចាំប្រទេសថៃបានបញ្ជាក់ថា ជនជាតិចិនម្នាក់បានស្លាប់ និងម្នាក់ទៀតរងរបួស។
ជនសង្ស័យត្រូវបានប៉ូលិសចាប់ខ្លួននៅកន្លែងកើតហេតុ និងប្រឈមមុខនឹងបទចោទជាច្រើនរួមទាំងអំពើមនុស្សឃាត។ រដ្ឋមន្ត្រីក្រសួងយុត្តិធម៌ថៃ លោក Thawee Sodsong បានប្រាប់សន្និសីទសារព័ត៌មានកាលពីថ្ងៃសុក្រថា ជនសង្ស័យកំពុងត្រូវបានឃុំខ្លួននៅក្នុងមន្ទីរឃុំឃាំងអនីតិជន បន្ទាប់ពីតុលាការបដិសេធមិនឲ្យនៅក្រៅឃុំ។
សេចក្តីថ្លែងការណ៍របស់ឪពុកម្តាយយុវជនរូបនេះបាននិយាយទៀតថា៖ខ្ញុំ និងក្រុមគ្រួសារមិនបានដាក់ពាក្យសុំនៅក្រៅឃុំទេ ដោយសារយើងមានបំណងសហការយ៉ាងពេញលេញជាមួយអាជ្ញាធរក្នុងការស្វែងរកការពិត និងធានាថានឹងមិនមានករណីហិង្សាដដែលៗកើតឡើងម្តងទៀតឡើយ៕ ប្រែសម្រួល៖ស៊ុនលី
