ភ្នំពេញ៖ និស្សិត ចាន់ ឧត្តម និស្សិតសាកលវិទ្យាល័យភូមិន្ទកសិកម្ម ដែលទទួលមរណភាព ក្នុងការវាយប្រយុទ្ធគ្នា រវាងកងទ័ពអ៉ីស្រាអែល និងក្រុមហាម៉ាស់ ត្រូវបានលោក Evan Penn ចាត់ទុកជាកុមារកម្ពុជាដ៏ឆ្នើមម្នាក់ តាមរយៈការអប់រំ ឧស្សាហ៍ព្យាយាម និងយកចិត្តទុកដាក់ តែងតែទទួលបានពិន្ទុខ្ពស់ជាងគេ ក្នុងថ្នាក់។
យោងតាមសំណេរ សម្តែងនូវក្តីទុក្ខសោកសង្រេងព្រមជាមួយក្តីអាណិតអាសូរចំពោះការបាត់បង់ និស្សិតខ្មែរខាងលើនេះ លោក Evan Penn បានបញ្ជាក់ថា”អស់រយៈពេលប្រាំបីឆ្នាំមកនេះ ពួកយើងបានជួយកុមារកម្ពុជាដ៏ឆ្នើមម្នាក់ឈ្មោះ ឧត្តម តាមរយៈការអប់រំរបស់គាត់។ គាត់ឧស្សាហ៍ព្យាយាម និងយកចិត្តទុកដាក់ តែងតែទទួលបានពិន្ទុខ្ពស់ជាងគេក្នុងថ្នាក់របស់គាត់។ ឪពុកចុងរបស់ខ្ញុំ (Issy) បានសន្យាថានឹងបញ្ជូនគាត់ទៅប្រទេសអ៊ីស្រាអែល ដើម្បីសិក្សាផ្នែកពេទ្យសត្វ នៅពេលដែលគាត់បានបញ្ចប់ការសិក្សា ដើម្បីគាត់អាចរៀនអំពីប្រទេសអ៊ីស្រាអែល និងនាំយកចំណេះដឹងសំខាន់ៗមកកម្ពុជាវិញ ដើម្បីជួយប្រជាជន របស់គាត់។ យើងក៏បានជោគជ័យ បញ្ជូនគាត់ទៅអ៉ីស្រាអែល ហើយទើបតែពីរសប្តាហ៍មុនគាត់បានមកដល់ kibbutz ក្បែរព្រំដែន Gaza ដើម្បីចាប់ផ្តើមការសិក្សារបស់គាត់។ កាលពីយប់មិញ ជីវិតរបស់គាត់ត្រូវបានគេបាត់បង់ដោយភេវរក ហាម៉ាស។ ឧត្តម គឺមិនដែលធ្វើបាបអ្នកណាម្នាក់ គាត់មិនមែនជា Jewish ឬជាជនជាតិអ៊ីស្រាអែល តែគាត់ជាជនរងគ្រោះនៃ សោកនាដកម្ម ការស្អប់ខ្ពើម និងអំពើហិង្សាដោយគ្មានការរើសអើងអ្នកណាជាអ្នកណា។ ដោយសេចក្តីសោកសង្រេងជាអនេក ខ្ញុំសង្ឃឹមថា អ្នកបានចែកឋានទៅកាន់សុគតិភព និងសូមជូនពរក្រុមគ្រួសាររបស់អ្នកមានអាយុយឺនយូរ”៕
