តូក្យូ៖ រដ្ឋាភិបាលជប៉ុន ត្រូវបានគេប៉ាន់ប្រមាណថា នឹងចំណាយប្រាក់លើស ពីការរំពឹងទុកចំនួន ១៦៤,៧ពាន់លានយ៉េន (១,៦១ពាន់លានដុល្លារ) លើការតាំងពិពណ៌ពិភពលោកឆ្នាំ២០២៥ នៅទីក្រុងអូសាកា ចំពេលមានការព្រួយបារម្ភ ជាសាធារណៈ អំពីការចំណាយកើនឡើង សម្រាប់ព្រឹត្តិការណ៍ពិភពលោក។
បន្ថែមពីលើចំនួនសរុប ដែលរាប់បញ្ចូលទាំងការចំណាយលើសកម្មភាពដេញថ្លៃ រដ្ឋាភិបាលកណ្តាល អាជ្ញាធរមូលដ្ឋាន និងវិស័យឯកជនត្រូវបានគេព្យាករថានឹងចាក់ចំនួន ៩,៧ ពាន់ពាន់លានយ៉េន ទៅក្នុងការអភិវឌ្ឍន៍ហេដ្ឋារចនាសម្ព័ន្ធសម្រាប់ព្រឹត្តិការណ៍នេះ។
ជាមួយនឹងការចំណាយកាន់តែធំជាងការប៉ាន់ប្រមាណដំបូង រដ្ឋាភិបាលនឹងបង្កើតក្រុមមួយ រួមទាំងអ្នកជំនាញភាគីទី៣ ដើម្បីពិនិត្យមើលថាតើការបន្តចាក់បញ្ចូលលុយអ្នកជាប់ពន្ធយ៉ាងច្រើនទៅក្នុងគម្រោងនេះគឺសមស្របដែរឬទេ។
ក្នុងចំណោមទឹកប្រាក់ ៩,៧ពាន់ពាន់លានយ៉េន ៨៣៩ពាន់លានយ៉េននឹងត្រូវចំណាយលើការកសាងហេដ្ឋារចនាសម្ព័ន្ធសម្រាប់ការតាំងពិព័រណ៍នៅភាគខាងលិចប្រទេសជប៉ុនដែលបានគ្រោងទុកសម្រាប់ថ្ងៃទី១៣ ខែមេសា ដល់ថ្ងៃទី១៣ ខែតុលា ឆ្នាំ២០២៥ ដូចជាផ្លូវសម្រាប់ចូលទៅកាន់កន្លែងប្រារព្ធពិធីនៅ Yumeshima ដែលជាកោះដែលបង្កើតឡើងដោយមនុស្សនៅឆ្នេរសមុទ្រអូសាកា។
ការចំណាយក៏រាប់បញ្ចូលទាំងថវិកាដែលធានាដើម្បីកែលម្អផ្លូវថ្នល់ និងទន្លេដែលទាក់ទងនឹងព្រឹត្តិការណ៍នេះនៅក្នុង និងជុំវិញតំបន់ ដែលត្រូវបានគេរំពឹងថានឹងមានការចូលរួមពីប្រទេស និងតំបន់ប្រហែល ១៦០៕
ប្រែសម្រួល ឈូក បូរ៉ា
