ហ្សាកាតា៖ ប្រទេសឥណ្ឌូណេស៊ី នៅថ្ងៃព្រហស្បតិ៍នេះ បានបញ្ជូនកប៉ាល់សម្រាប់ព្យាបាលអ្នកជំងឺ ឬហៅថាកប៉ាល់មន្ទីរពេទ្យ សម្រាប់បេសកកម្មមនុស្សធម៌ នៅតំបន់ហ្គាហ្សាស្ទ្រីប ជាកន្លែងដែលជម្លោះអ៊ីស្រាអែល និងក្រុមហាម៉ាស់ដែលកំពុងបន្ត នៅក្នុងតំបន់បានធ្វើឱ្យមនុស្ស ស្លាប់ជាង ២៤,០០០នាក់ និងរបួសជាង ៦១,០០០ នាក់ចាប់តាំងពីការផ្ទុះឡើងកាលពីខែតុលា ឆ្នាំមុន។
កប៉ាល់ដែលមាននាវិកជាង ២០០ នាក់នៅលើនោះកំពុងដឹកជំនួយមនុស្សធម៌ រួមទាំងថ្នាំពេទ្យ ភួយ សំលៀកបំពាក់ ទឹកដោះគោ នំប៊ីសស្ទីន ទឹកសារធាតុរ៉ែ និងមីកញ្ចប់ ទៅកាន់ទីក្រុង El Arish របស់ប្រទេសអេហ្ស៊ីប ដែលមានព្រំប្រទល់ជាប់ទីក្រុង Rafah ភាគខាងត្បូងហ្គាហ្សាស្ទ្រីប។
រដ្ឋាភិបាលបានកំណត់គោលដៅសម្រាប់កប៉ាល់នេះត្រឡប់ទៅទីក្រុងហ្សាការតាវិញក្នុងរយៈពេល ៥២ ថ្ងៃបន្ទាប់ពីការចាកចេញរបស់ខ្លួន នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិហួ។
រដ្ឋមន្ត្រីការពារជាតិរបស់ប្រទេសនេះ លោក Prabowo Subianto បាននិយាយនៅក្នុងសន្ទរកថាមួយក្នុងអំឡុងពិធីបញ្ជូននាវានៅកំពង់ផែមួយថា “នេះគឺជាភស្តុតាងនៃការគាំទ្ររបស់យើង ចំពោះប៉ាឡេស្ទីនក្នុងការតស៊ូរបស់ពួកគេ ដើម្បីការពារខ្លួន យើងបន្តជួយនូវអ្វីដែលយើងអាចធ្វើបានសម្រាប់ពួកគេ”៕
ប្រែសម្រួល ឈូក បូរ៉ា
រូបភាព៖ AsiaToday
