បរទេស ៖ ការវាយប្រហារ របស់អ៊ីស្រាអែល ជាក់ស្តែងលើគោលដៅយោធាអ៊ីរ៉ង់ កាលពីថ្ងៃសៅរ៍ក្នុងរដ្ឋធានី ដាម៉ាស ប្រទេសស៊ីរី គឺបានសម្លាប់មេបញ្ជាការកំពូលចំនួន៥នាក់នៃកងកម្លាំង al Quds របស់ក្រុងតេហេរ៉ង់ ។
យោងតាមសារព័ត៌មាន VOA ចេញផ្សាយនៅថ្ងៃទី២០ ខែមករា ឆ្នាំ២០២៤ បានឱ្យដឹងថា ការវាយប្រហារអគារលំនៅឋានមួយ បានធ្វើឱ្យកប់ជនរងគ្រោះនៅក្រោមគំនរបាក់បែក។ ទូរទស្សន៍ស៊ីរី បានផ្សាយដោយបង្ហាញរថយន្តស្ទូចមួយគ្រឿង ដែលព្យាយាមយកកំទេចកំទីចេញពីអគារដែលដួលរលំ ដើម្បីទាញសាកសពចេញពីក្រោមគំនរបាក់បែក។
អ៊ីស្រាអែលមិនបានធ្វើអត្ថាធិប្បាយជាផ្លូវការថា តើខ្លួននៅពីក្រោយការវាយប្រហារនេះឬយ៉ាងណាទេ។
Rami Abdul Rahman នៃក្រុមសង្កេតការណ៍សិទ្ធិមនុស្សស៊ីរី ដែលមានមូលដ្ឋាននៅទីក្រុងឡុងដ៍ បានប្រាប់ប្រព័ន្ធផ្សព្វផ្សាយអារ៉ាប់ថា លោកជឿថា គ្រាប់រ៉ុក្កែតរបស់អ៊ីស្រាអែល បានវាយប្រហារអគារនេះ បណ្តាលឱ្យដួលរលំ។
លោកបាននិយាយថា កាំជ្រួចរបស់អ៊ីស្រាអែល បានវាយប្រហារទៅលើអគារនេះ បើទោះបីជាមានរបាយការណ៍ខ្លះថា ការបំផ្ទុះរថយន្តបណ្តាល ឱ្យមានការផ្ទុះ ដែលបណ្តាលឱ្យអគារ (លំនៅដ្ឋានរបស់មេបញ្ជាការអ៊ីរ៉ង់) ដួលរលំក៏ដោយ។ លោកបានបន្តថា តំបន់ដែលរងការវាយប្រហារនោះ មានវត្តមានឆ្មាំបដិវត្តន៍អ៊ីរ៉ង់ ព្រមទាំងកម្លាំងរបស់អង្គការជីហាតអ៊ីស្លាម និងកងជីវពល Hezbollah របស់លីបង់៕
ប្រែសម្រួលៈ ណៃ តុលា
