បរទេស៖ យោងតាមការចេញផ្សាយរបស់ RT រដ្ឋាភិបាលបារាំងបានអះអាង កាលពីថ្ងៃសុក្រថា ជនជាតិបារាំងពីរនាក់បានស្លាប់ និងបីនាក់ផ្សេងទៀតបានរងរបួស ក្នុងសប្តាហ៍នេះនៅក្នុងប្រទេសអ៊ុយក្រែន ដែលពួកគេជាបុគ្គលិកនៃអង្គការមនុស្សធម៌។
ការប្រកាសនេះត្រូវបានធ្វើឡើង ដោយរដ្ឋមន្ត្រីការបរទេសបារាំងលោក Stephane Sejourne ដែលបានអះអាងថាឧប្បត្តិហេតុនេះ គឺជាឧទាហរណ៍មួយ នៃភាពព្រៃផ្សៃរបស់រុស្ស៊ី។
បុគ្គលិកមនុស្សធម៌ជនជាតិបារាំងពីរនាក់ បានចំណាយមួយជីវិតសម្រាប់ការប្តេជ្ញាចិត្ត របស់ពួកគេចំពោះជនជាតិអ៊ុយក្រែន នេះបើយោងតាមការ Sejourne បានសរសេរនៅលើប្រព័ន្ធផ្សព្វផ្សាយសង្គម X ។
សារស្រដៀងគ្នានេះ បានមកពីប្រធានាធិបតីបារាំង Emmanuel Macron ដែលបាននិយាយថា ក្រុមការងារអ្នកស្ម័គ្រចិត្តទាំងនោះ ត្រូវបានសម្លាប់នៅក្នុងការវាយប្រហារ របស់រុស្ស៊ីហើយសកម្មភាពនេះគួរតែត្រូវបាន ថ្កោលទោសពីព្រោះថាវាគឺជាទង្វើកំសាក និងមិនសក្តិសម។
ខណៈពេលដែលរដ្ឋាភិបាលបារាំង មិនបានបង្ហាញពីព័ត៌មានលម្អិតបន្ថែមទៀត នៃកិច្ចការនេះ គេជឿជាក់ថា វាបានកើតឡើងនៅក្នុងការវាយប្រហារមួយ ដែលបានសម្លាប់ពលរដ្ឋស៊ីវិលដែលបាន កើតឡើងនៅដើមសប្តាហ៍នេះនៅទីក្រុង Kherson ៕
ប្រែសម្រួល៖ ស៊ុន លី
