យេរ៉ូសាឡឹម ៖ អ៊ីស្រាអែល កំពុងប្រឈមនឹងការអំពាវនាវបន្ថែមទៀត ឱ្យយល់ព្រមលើបទឈប់បាញ់ នៅតំបន់ហ្គាហ្សា ខណៈជម្លោះដ៏សាហាវរបស់ខ្លួនជាមួយក្រុមហាម៉ាស បានអូសបន្លាយអស់រយៈពេលជាង ៤ខែហើយបានឆក់យក ជីវិតប្រជាជនប៉ាឡេស្ទីន រាប់ម៉ឺននាក់នៅតំបន់ហ្គាហ្សា។
ការអំពាវនាវនេះបានកើតឡើង នៅពេលដែលអ៊ីស្រាអែល កំពុងបង្ហាញថា ខ្លួនគ្រោងនឹងចាប់ផ្តើមប្រតិបត្តិការ ជើងគោកនៅទីក្រុងរ៉ាហ្វា ជាទីក្រុងភាគខាងត្បូង បំផុត របស់តំបន់ហ្គាហ្សា ដែលជាកន្លែងដែលប្រជាជន ប៉ាឡេស្ទីន ប្រហែល ១,៤លាននាក់ បានភៀសខ្លួន បានស្វែងរកការជ្រកកោន ពីការទម្លាក់គ្រាប់បែកឥតឈប់ឈរ របស់អ៊ីស្រាអែល នៅក្នុងតំបន់ផ្សេងទៀតនៃតំបន់ឆ្នេរ។
កាលពីថ្ងៃពុធ ប្រធានាធិបតីបារាំងលោក អេម៉ានុយអែល ម៉ាក្រុង បាននិយាយតាមទូរស័ព្ទជាមួយនាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ ហើយបានប្រាប់លោកថា ប្រទេសបារាំងប្រឆាំងនឹងការវាយលុករបស់អ៊ីស្រាអែលនៅក្រុងរ៉ាហ្វា។
លោក ម៉ាក្រុង បានឲ្យដឹងថា ការវាយប្រហារបែបនេះ “អាចនាំទៅរកគ្រោះមហន្តរាយ មនុស្សធម៌នៃទំហំថ្មីមួយប៉ុណ្ណោះ” នេះបើយោងតាមការអាន ចេញផ្សាយដោយវិមាន Elysee ។ លោកបានលើកឡើងថា វានឹងជាការរំលោភច្បាប់ មនុស្សធម៌អន្តរជាតិ ហើយនឹងបង្កហានិភ័យបន្ថែមទៀតនៃការកើនឡើងក្នុងតំបន់ ៕
ប្រែសម្រួល ឈូក បូរ៉ា
