បរទេស៖ មេដឹកនាំបក្សប្រឆាំង របស់ប្រទេសថៃ លោក Chaithawat Tulaton កាលពីថ្ងៃព្រហស្បតិ៍បានព្រមានពី “តំណែងនាយករដ្ឋមន្ត្រីពីររូប” នៅក្នុងនយោបាយថៃ បន្ទាប់ពីអតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រា ត្រូវដោះលែងឱ្យនៅក្រៅឃុំនៅសប្តាហ៍ក្រោយ។
យោងតាមសារព័ត៌មាន The Nation របសថៃ ចេញផ្សាយកាលពីថ្ងៃទី១៥ ខែកុម្ភៈ ឆ្នាំ២០២៤ បានឱ្យដឹងថា លោក Chaithawat បាននិយាយថា នាយករដ្ឋមន្ត្រី សេដ្ឋា ថាវីស៊ីន និងគណបក្សភឿថៃ ដែលកំពុងកាន់អំណាច គួរតែធ្វើសកម្មភាពដោយប្រុងប្រយ័ត្នដើម្បីការពារការចោទប្រកាន់អំពីការធ្វើអន្តរាគមន៍របស់លោកថាក់ស៊ីន នៅក្នុងរដ្ឋាភិបាលរបស់ពួកគេ។
លោក Chaithawat ដែលជាប្រធានគណបក្សប្រឆាំងស្នូល គឺគណបក្ស Move Forward បានថ្លែងថា “វានឹងមើលទៅដូចជាមាននាយករដ្ឋមន្ត្រីពីរ។ ប្រសិនបើពួកគេមិនធ្វើការដោយប្រុងប្រយ័ត្ន រដ្ឋាភិបាលនឹងឃើញបញ្ហាក្នុងការគ្រប់គ្រងប្រទេស។
លោកបានបន្តថា “ការព្រមានរបស់ខ្ញុំចំពោះរដ្ឋបាលគឺថា ពួកគេមិនត្រូវអនុញ្ញាតឱ្យមាននាយករដ្ឋមន្ត្រីពីរកើតឡើងនោះទេ” ដោយបន្ថែមថាស្ថានភាពបែបនេះអាច “បង្កបញ្ហា” សម្រាប់នាយករដ្ឋមន្ត្រីបច្ចុប្បន្ន សេដ្ឋា ថាវីស៊ីន ។
លោក Chaithawat បាននិយាយទៀតថា លោក ថាក់ស៊ីន ស៊ីណាវ៉ាត្រា មានសិទ្ធិធ្វើអត្ថាធិប្បាយនយោបាយ បន្ទាប់ពីការដោះលែងលោកឱ្យនៅក្រៅឃុំដែលត្រូវបានគេរំពឹងថា នឹងត្រូវធ្វើឡើងនៅថ្ងៃទី១៨ ខែកុម្ភៈនេះ ប៉ុន្តែការធ្វើបែបនេះអាចធ្វើឲ្យរដ្ឋាភិបាលដឹកនាំដោយគណបក្សភឿថៃមិនសប្បាយចិត្ត។
លោកបាននិយាយថា “វានឹងមានការភាន់ច្រលំថាអ្នកណាជានាយករដ្ឋមន្ត្រីពិតប្រាកដ ហើយអ្នកណាជាអ្នកនិយាយចុងក្រោយ។ ប្រមុខបក្សប្រឆាំងបាននិយាយថា រដ្ឋាភិបាល និងបក្សភឿថៃត្រូវតែប្រុងប្រយ័ត្នចំពោះរឿងនេះ។
លោកថាក់ស៊ីន ដែលត្រូវបានចាត់ទុកថាជាចាស់ព្រឹទ្ធាចារ្យរបស់គណបក្សភឿថៃ ត្រូវបានគេជឿថាបានរក្សាឥទ្ធិពលរបស់គាត់លើគណបក្សកាន់អំណាចដដែល ទោះបីជាគាត់មិនកាន់តំណែងប្រតិបត្តិក៏ដោយ៕ ប្រែសម្រួលៈ ណៃ តុលា
