បរទេស៖ ប្រទេសអេក្វាឌ័របានលុបចោលផែនការលក់ឧបករណ៍យោធារុស្ស៊ី និងអ៊ុយក្រែនហួសសម័យ ទៅឱ្យទីក្រុងវ៉ាស៊ីនតោន ជាថ្នូរនឹងប្រាក់ ២០០ លានដុល្លារ, នេះបើយោងតាមបេសកជនរបស់ទីក្រុងមូស្គូប្រចាំរដ្ឋអាមេរិកខាងត្បូង។ មន្ត្រីអាមេរិកបានស្នើថា សព្វាវុធនឹងត្រូវបរិច្ចាគទៅក្រុងគៀវ។
យោងតាមសារព័ត៌មាន RT ចេញផ្សាយនៅថ្ងៃទី១៧ ខែកុម្ភៈ ឆ្នាំ២០២៤ បានឱ្យដឹងថា ថ្លែងទៅកាន់សារព័ត៌មាន RIA Novosti បន្ទាប់ពីជំនួបជាមួយប្រធានាធិបតីអេក្វាឌ័រ លោក Daniel Noboa កាលពីថ្ងៃសុក្រ ឯកអគ្គរដ្ឋទូតរុស្ស៊ី លោក Vladimir Sprinchan បាននិយាយថា ទីក្រុង Quito បានផ្លាស់ប្តូរទិសដៅលើការដោះដូរអាវុធ ដោយពន្យល់ថា អេក្វាឌ័រចង់នៅឆ្ងាយពីជម្លោះដែលកំពុងកើនឡើងនៅអ៊ុយក្រែន។
លោកបាននិយាយថា “ជំហររបស់អេក្វាឌ័រគឺមិនមែនបញ្ជូនអាវុធ និងគ្រាប់រំសេវទៅកាន់តំបន់ក្តៅនោះទេ ប៉ុន្តែជាការរួមចំណែកដល់ការដោះស្រាយជម្លោះដោយសន្តិវិធី តាមរយៈឧបករណ៍ការទូត”។
ដើម្បីបញ្ជាក់ថាតើការផ្ទេរអាវុធត្រូវបានបញ្ឈប់ឬអត់នោះ លោក Sprinchan បានឆ្លើយថា ជាការពិត ដោយបន្ថែមថាការសម្រេចចិត្តនឹងត្រូវបានគេដឹងជាផ្លូវការនៅដើមសប្តាហ៍ក្រោយ៕ ប្រែសម្រួលៈ ណៃ តុលា
