បរទេស៖ កងទ័ពជើងទឹកថៃ បាននិយាយនៅថ្ងៃសុក្រថា ទាហាន៩នាក់នឹងត្រូវចាកចេញពីមន្ទីរពេទ្យភ្លាមៗ បន្ទាប់ពីបានទទួលរងរបួសស្រាល ពីការបាញ់ប្រហារដោយចៃដន្យ នៅឯនាវាចម្បាំងរបស់ប្រទេសពីរគ្រឿង នៅមូលដ្ឋានទ័ពជើងទឹក Sathip។
យោងតាមសារព័ត៌មាន បាងកក របស់ថៃ ចេញផ្សាយនៅថ្ងៃទី១៥ ខែមីនា ឆ្នាំ២០២៤ បានឱ្យដឹងថា កងទ័ពជើងទឹកបានឱ្យដឹងថា អ្នករបួសទាំង៩នាក់ កំពុងរង់ចាំការយល់ព្រម ពីវេជ្ជបណ្ឌិតនៅមន្ទីរពេទ្យ Somdech Phra Nanghcoa Sirikit ដើម្បីត្រឡប់ទៅផ្ទះវិញ។
ទន្ទឹមនឹងនេះ ទាហាន ៥នាក់ផ្សេងទៀតកំពុងស្ថិតក្រោមការឃ្លាំមើលយ៉ាងដិតដល់នៅមន្ទីរពេទ្យនៅស្រុក Sathip ខេត្ត Chon Buri។
ជនរងគ្រោះទាំងអស់ បម្រើការនៅលើ នាវាចម្បាំង HTMS Khirirat ។ ពួកគេរងគ្រោះពីការស្រូបផ្សែង នៅពេលដែលគ្រាប់ពីកាំភ្លើង ធំខាងមុខរបស់នាវាចម្បាំង HTMS Chonburi បានបាញ់ចេញដោយអចេតនា ដោយបានវាយប្រហារផ្នែកខាងក្រោយរបស់នាវាកាលពីថ្ងៃព្រហស្បតិ៍។
ឧបទ្ទវហេតុនេះបានកើតឡើង ខណៈពេលដែលនាវាចម្បាំងទាំងពីរគ្រឿង កំពុងចូលចតនៅមូលដ្ឋានទ័ពជើងទឹក Sathip ។
មេទ័ពជើងទឹកថៃ លោកឧត្តមសេនីយ៍ Adung Phan-iam បានចាត់តាំងឧត្តមនាវីឯក Chartchai Thongsa-ard មេបញ្ជាការកងនាវាចរថៃ ដឹកនាំការស៊ើបអង្កេត លើឧបទ្ទវហេតុនេះ ដោយលទ្ធផលត្រូវបានរំពឹង ទុកនឹងដឹងក្នុងរយៈពេលបីថ្ងៃ ៕
ប្រែសម្រួលៈ ណៃ តុលា
