រដ្ឋមន្រ្តីការពារជាតិចិន និងរដ្ឋមន្រ្តីការពារជាតិអាមេរិក ពិភាក្សាជាមួយគ្នាជាលើកដំបូង ក្រោយខកបានចាប់តាំងពីឆ្នាំ ២០២២មក

បរទេស៖ រដ្ឋមន្ត្រីការពារជាតិ អាមេរិក លោក Lloyd Austin បានពិភាក្សាជាមួយសមភាគីចិនកាលពីថ្ងៃអង្គារ ដែលជាកិច្ចសន្ទនាលើកដំបូង រវាងប្រមុខការពារជាតិនៃប្រទេស ទាំងពីរក្នុងរយៈពេលជិត ១៧ ខែមកនេះ។

យោងតាមសារព័ត៌មាន VOA ចេញផ្សាយនៅថ្ងៃទី១៧ ខែមេសា ឆ្នាំ២០២៤ បានឱ្យដឹងថា មន្ទីរបញ្ចកោណបាននិយាយថា លោក Austin និងឧត្តមនាវីឯកចិន លោក Dong Jun បានពិភាក្សាអំពី ” ទំនាក់ទំនងការពារជាតិ” និងបញ្ហាសន្តិសុខពិភពលោក ពីសង្គ្រាមដែលមិនបង្កហេតុ របស់រុស្ស៊ីនៅអ៊ុយក្រែន ទៅនឹងការបង្កហេតុថ្មីៗ ពីកូរ៉េខាងជើង។

សេចក្តីប្រកាសព័ត៌មាន របស់មន្ទីរបញ្ចកោណបាននិយាយថា លោក Austin បានសង្កត់ធ្ងន់លើសារៈសំខាន់នៃ “ការគោរពចំពោះសេរីភាព នៃការធ្វើនាវាចរណ៍នៅសមុទ្រខ្ពស់ ដែលត្រូវបានធានានៅក្រោមច្បាប់អន្តរជាតិ ជាពិសេសនៅសមុទ្រចិនខាងត្បូង”។

ទីក្រុងប៉េកាំងបានអះអាងពីបំណងរបស់ខ្លួនក្នុងការគ្រប់គ្រង ការចូលទៅកាន់សមុទ្រចិនខាងត្បូង និងនាំយកកោះតៃវ៉ាន់ មកក្រោមការគ្រប់គ្រងរបស់ខ្លួន ដោយកម្លាំងប្រសិនបើចាំបាច់ ។ ប្រធានាធិបតី Joe Biden បាននិយាយថា ទាហានអាមេរិកនឹង ការពារកោះដែលគ្រប់គ្រង ដោយលទ្ធិប្រជាធិបតេយ្យ ពីការវាយប្រហារ។

សេចក្តីថ្លែងការណ៍របស់ក្រសួងការពារជាតិចិនបាននិយាយថា បញ្ហារបស់កោះតៃវ៉ាន់គឺជា “ផលប្រយោជន៍ស្នូលរបស់ចិន” ។

លោក Dong បាននិយាយថា “ភាគីអាមេរិក គួរតែទទួលស្គាល់ជំហររឹងមាំរបស់ចិន គោរពអធិបតេយ្យភាពទឹកដី និងសិទ្ធិ និងផលប្រយោជន៍ ដែនសមុទ្ររបស់ចិន នៅសមុទ្រចិនខាងត្បូង ហើយចាត់វិធានការជាក់ស្តែង ដើម្បីការពារសន្តិភាពក្នុងតំបន់”៕
ប្រែសម្រួលៈ ណៃ តុលា