យេរ៉ូសាឡឹម៖ រដ្ឋមន្ត្រីខុទ្ទកាល័យសង្គ្រាមអ៊ីស្រាអែល លោក Benny Gantz បានជំរុញរដ្ឋមន្ត្រីការបរទេសអាមេរិក លោក Antony Blinken ក្នុងការហៅទូរស័ព្ទឱ្យពិចារណាឡើងវិញ នូវទណ្ឌកម្ម ដែលអាចកើតមាន ប្រឆាំងនឹងអង្គភាពយោធា អ៊ីស្រាអែល។
ការអំពាវនាវជាមួយលោក Blinken បានកើតឡើងបន្ទាប់ពីប្រព័ន្ធផ្សព្វផ្សាយ អ៊ីស្រាអែលបានរាយការណ៍ថា ក្រសួងការបរទេសសហរដ្ឋអាមេរិក អាចនឹងដាក់ទណ្ឌកម្ម កងវរសេនាតូច Netzah Yehuda របស់កងកម្លាំងការពារ អ៊ីស្រាអែល (IDF) ដែលត្រូវបានចោទប្រកាន់ ពីបទរំលោភសិទ្ធិមនុស្ស នៅតំបន់ West Bank ។
លោក Gantz បានប្រាប់លោក Blinken ថាការផ្លាស់ប្តូរនេះនឹង “ធ្វើឱ្យប៉ះពាល់ដល់ភាពស្របច្បាប់របស់អ៊ីស្រាអែល ក្នុងគ្រាមានសង្រ្គាម” ដោយអះអាងថា “វាគ្មានហេតុផលនោះទេ ពីព្រោះអ៊ីស្រាអែល មានប្រព័ន្ធតុលាការរឹងមាំ និងឯករាជ្យ”។
ទន្ទឹមនឹងនេះដែរ នាយករដ្ឋមន្ត្រីលោក បេនចាមីន ណេតាន់យ៉ាហ៊ូ បានប្តេជ្ញាថានឹងប្រយុទ្ធប្រឆាំងនឹងទណ្ឌកម្មណាមួយដែលត្រូវបានដាក់លើផ្នែកខ្លះនៃ IDF ដោយ “កម្លាំងទាំងអស់” នេះបើយោងតាមសេចក្តីថ្លែងការណ៍របស់លោកកាលពីថ្ងៃសៅរ៍។
កងកម្លាំង IDF បានឲ្យដឹងកាលពីថ្ងៃអាទិត្យថា កងវរសេនាតូច Netzah Yehuda បច្ចុប្បន្នកំពុងចូលរួមក្នុងការប្រយុទ្ធនៅតំបន់ហ្គាហ្សាស្ទ្រីប។ យោធាបានឲ្យដឹងនៅក្នុងសេចក្តីថ្លែងការណ៍មួយថា “កងវរសេនាតូចកំពុងធ្វើប្រតិបត្តិការប្រកបដោយវិជ្ជាជីវៈ និងក្លាហានស្របតាមក្រមសីលធម៌របស់ IDF និងជាមួយនឹងការប្តេជ្ញាចិត្តពេញលេញ ចំពោះច្បាប់អន្តរជាតិ”៕
ប្រែសម្រួល ឈូក បូរ៉ា
