អាល្លឺម៉ង់ ធ្វើសមយុទ្ធយោធាទ្រង់ទ្រាយធំ នៅជិតព្រំដែនប្រទេសរុស្ស៊ី

បរទេស៖ បុគ្គលិកយោធាអាល្លឺម៉ង់ជាង ៣.០០០ នាក់ កាលពីថ្ងៃអង្គារ គឺកំពុងចូលរួមក្នុងសមយុទ្ធ Grand Quadriga 2024 ដែលបានចាប់ផ្តើមនៅប្រទេសលីទុយអានី។ សមយុទ្ធនេះគឺជាផ្នែកមួយនៃសមយុទ្ធ Steadfast Defender 24 ស៊េរីធំជាងរយៈពេលជាច្រើនខែរបស់អង្គការណាតូ ដែលបានចាប់ផ្តើមនៅចុងខែមករា។

យោងតាមសារព័ត៌មាន RT ចេញផ្សាយនៅថ្ងៃទី២៣ ខែមេសា ឆ្នាំ២០២៤ បានឱ្យដឹងថា ប្រទេសលីទុយអានី មានព្រំប្រទល់ជាប់នឹងតំបន់ Kaliningrad របស់រុស្ស៊ី ក៏ដូចជាសម្ព័ន្ធមិត្តជិតបំផុតរបស់មូស្គូ គឺប្រទេសបេឡារុស្ស។ នៅក្នុងការអភិវឌ្ឍន៍ដាច់ដោយឡែកមួយនៅដើមខែនេះ ទីក្រុងប៊ែរឡាំងបានដាក់ពង្រាយក្រុមយោធាកម្រិតខ្ពស់ទៅកាន់ប្រទេសនៅរដ្ឋបាល់ទិក ដែលជាផ្នែកមួយនៃផែនការសម្រាប់កងពលតូចពាសដែកពេញកម្លាំងដែលឈរជើងជាអចិន្ត្រៃយ៍នៅទីនោះ។ ទីក្រុងមូស្គូបានពណ៌នាផែនការនេះថា ជាការគំរាមកំហែងដែលទាមទារ “វិធានការពិសេស” សម្រាប់ជាការឆ្លើយតបវិញ។

សមយុទ្ធ Grand Quadriga 2024 គ្រោងនឹងបញ្ចប់នៅចុងខែឧសភា ហើយនឹងមានផ្នែករឹងរបស់យោធាអាល្លឺម៉ង់ចំនួន ២០០ គ្រឿង រួមទាំងរថក្រោះ Leopard ក៏ដូចជារថយន្តប្រយុទ្ធថ្មើរជើង Puma និង Boxer ផងដែរ៕ ប្រែសម្រួលៈ ណៃ តុលា