ភ្នំពេញ ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា និងលោក Linkham DOOUANGSAVNH រដ្ឋមន្ត្រីក្រសួងកសិកម្ម និងព្រៃឈើឡាវ បានអញ្ជើញជាអធិបតីក្នុងពិធីប្រគល់-ទទួលសត្វដំរី ដែលជាអំណោយ របស់រដ្ឋាភិបាលឡាវ ថ្វាយព្រះករុណា ព្រះបាទ សម្តេចព្រះបរមនាថនរោត្តម សីហមុនី ព្រះមហាក្សត្រកម្ពុជា នៅឧទ្យានសួនសត្វព្រៃការពារ និងសួនភូតគាមភ្នំតាម៉ៅ ។
![](https://dap-news.com/wp-content/uploads/2024/05/photo_2024-05-13_09-27-34-1024x577.jpg)
ក្នុងពិធីប្រគល់-ទទួលសត្វដំរីនេះ ធ្វើឡើងនាថ្ងៃ១២ ឧសភា ។ លោករដ្ឋមន្ត្រី មានប្រសាសន៍ថា «ពិធីប្រគល់-ទទួលដំរី មួយគូថ្ងៃនេះ គឺមានអត្ថន័យ ជ្រាលជ្រៅនៃប្រទេសទាំងពីរ ហើយវត្តមានប្រតិភូ ជាន់ខ្ពស់បង្ហាញ ពីមិត្តភាពកម្រិតខ្ពស់ កិច្ចសហការល្អ និងក្នុងនាមអ្នកជិតខាងល្អ»។
![](https://dap-news.com/wp-content/uploads/2024/05/photo_2024-05-13_09-27-39-1024x577.jpg)
លោករដ្ឋមន្ត្រី ក៏បានរំលឹកថា សត្វដំរី បានឆ្លាក់នៅលើជញ្ជាំងប្រាសាទអង្គរវត្ត បាយ័ន និងប្រាសាទនានា ដែលកាលសម័យ បុរាណបុព្វបុរសខ្មែរ បានយកសត្វដំរីមកប្រើប្រាស់ជាមធ្យោបាយដឹកជញ្ជូន ការធ្វើដំណើរ និងការធ្វើសង្គ្រាមជាដើម។ បើទោះជាយ៉ាងនេះក្តី លោករដ្ឋមន្ត្រី បានសង្កត់បញ្ជាក់ថា បច្ចុប្បន្នសត្វដំរីត្រូវបានទទួលរងការគម្រាមកំហែង ចាំបាច់ត្រូវធ្វើការការពារ ថែរក្សា ហើយរាជរដ្ឋាភិបាល កម្ពុជាបង្កើត និងលើកកម្ពស់សត្វដំរីព្រៃ ដោយក្នុងនោះការបង្កើត កម្មវិធីភ្លុកដំរី និងយុទ្ធសាស្ត្រនានាជាមួយដៃគូនានាក្នុងការការពារ និងអភិរក្សដំរី។
![](https://dap-news.com/wp-content/uploads/2024/05/photo_2024-05-13_09-27-44-1024x577.jpg)
សូមជម្រាបថា បន្ទាប់ពីទស្សនកិច្ចផ្លូវរដ្ឋនៅកម្ពុជា កាលពីថ្ងៃទី២៣-២៤ មេសា លោក Thongloun SISOULITH ប្រធានរដ្ឋឡាវ បានថ្វាយ នូវតង្វាយសត្វដំរីចំនួនមួយគូ (ញីមួយ និងឈ្មោលមួយ) ដល់ព្រះមហាក្សត្រ ដើម្បីជានិមិត្តរូប នៃចំណងសាមគ្គីភាពរវាងរដ្ឋាភិបាល និងប្រជាជាតិ ទាំងពីរ ហើយព្រះអង្គទ្រង់សព្វព្រះរាជហឫទ័យ ដោយសេចក្តី សោមនស្សជាអនេកទទួល តង្វាយសត្វដំរីមួយគូនេះ និងប្រោសព្រះរាជប្រទានជូនមករាជរដ្ឋាភិបាលកម្ពុជា ដើម្បីដឹកនាំចាត់ចែងរៀបចំពិធីប្រគល់-ទទួល និងទទួលចិញ្ចឹមថែរក្សាជាបន្ត នៅឧទ្យានសួនសត្វព្រៃការពារ និងសួនភូតគាម «ភ្នំតាម៉ៅ»៕
![](https://dap-news.com/wp-content/uploads/2024/05/photo_2024-05-13_09-27-48-1024x577.jpg)
![](https://dap-news.com/wp-content/uploads/2024/05/photo_2024-05-13_09-27-53-1024x577.jpg)
![](https://dap-news.com/wp-content/uploads/2024/05/photo_2024-05-13_09-27-58-1024x577.jpg)
![](https://dap-news.com/wp-content/uploads/2024/05/photo_2024-05-13_09-28-02-1024x576.jpg)
![](https://dap-news.com/wp-content/uploads/2020/08/1-1.png)