តូក្យូ ៖ ប្រភពការទូតមួយបានឲ្យដឹងថា ក្រុមប្រទេសឧស្សាហកម្មទាំង៧ នឹងសន្យាជំរុញ ការអភិវឌ្ឍន៍ប្រកបដោយការទទួលខុសត្រូវ និងការប្រើប្រាស់បញ្ញាសិប្បនិម្មិត ក្នុងវិស័យយោធានៅក្នុងសេចក្តីថ្លែងការណ៍រួមមួយ នៅឯកិច្ចប្រជុំកំពូល នាពេលខាងមុខរបស់ពួកគេ។
ប្រភពបានលើកឡើង ពីសេចក្តីថ្លែងការណ៍ព្រាង ដែលគេរំពឹងថា នឹងត្រូវបានចេញនៅក្នុងការជួបជុំរបស់មេដឹកនាំ G7 ដែលគ្រោងនឹងធ្វើឡើងរយៈពេលបីថ្ងៃចាប់ពីថ្ងៃទី១៣ ខែមិថុនា នៅទីក្រុង Fasano ភាគខាងត្បូងប្រទេសអ៊ីតាលី។ សេចក្តីព្រាងនេះអំពាវនាវ ឱ្យមានការប្រើប្រាស់កាន់តែទូលំទូលាយនៃប្រព័ន្ធ AI ប៉ុន្តែក៏គូសបញ្ជាក់អំពីតម្រូវការក្នុងការដោះស្រាយព័ត៌មានមិនពិត និងហានិភ័យផ្សេងៗទៀត ។
យោងតាមប្រភពបានឱ្យដឹងថា ដោយទទួលស្គាល់តួនាទីរបស់ AI ក្នុងការអភិវឌ្ឍន៍នៅក្នុងសង្គម មេដឹកនាំ G7 នឹងប្តេជ្ញានៅក្នុងសេចក្តីថ្លែងការណ៍ ដែលបានគ្រោងទុកថានឹង “លើកកម្ពស់ AI ប្រកបដោយសុវត្ថិភាព និងគួរឱ្យទុកចិត្ត ខណៈពេលដែលបន្តស្វែងរកការផ្លាស់ប្តូរឌីជីថលដែលផ្តោតលើមនុស្ស និងការរួមបញ្ចូលគ្នា” ។
ការផ្លាស់ប្តូរនេះកើតឡើង នៅពេលដែលពិភពលោក កំពុងដោះស្រាយជាមួយនឹងការអភិវឌ្ឍន៍យ៉ាងឆាប់រហ័សនៃឧបករណ៍ AI ជំនាន់មុន រួមទាំងម៉ូដែលនាំមុខ ChatGPT ចំពេលមានការភ័យខ្លាចថា ការរីករាលដាលនៃព័ត៌មានមិនពិតតាមរយៈការប្រើប្រាស់ AI ខុសអាចគំរាមកំហែង ដល់លទ្ធិប្រជាធិបតេយ្យ និងស្ថិរភាពនយោបាយ។
កាលពីខែឧសភា សហភាពអឺរ៉ុប បានអនុម័តក្របខ័ណ្ឌច្បាប់ដ៏ទូលំទូលាយដំបូងបង្អស់របស់ពិភពលោក ស្តីពី AI ដោយហាមឃាត់ប្រព័ន្ធ “ការដាក់ពិន្ទុសង្គម” ដែលផ្តល់ចំណាត់ថ្នាក់ពលរដ្ឋដោយផ្អែកលើការរួមបញ្ចូលគ្នានៃទិន្នន័យផ្ទាល់ខ្លួនដូចជាអាកប្បកិរិយាអនឡាញ និងក្រៅបណ្តាញ ក្នុងចំណោមអ្នកដទៃទៀត។
ប្រភពបានឲ្យដឹងទៀងថា សមាជិក G7 ទំនងជតនឹងប្រកាសពីការបង្កើតផែនការសកម្មភាពលើការប្រើប្រាស់ AI នៅកន្លែងធ្វើការដើម្បីបង្កើនផលិតភាព និងគុណភាពនៃលក្ខខណ្ឌ ខណៈពេលដែលទាមទារឱ្យមានការអនុលោមតាមច្បាប់អន្តរជាតិនៅពេលដែល AI ត្រូវបានប្រើ សម្រាប់គោលបំណងយោធា៕
ប្រែសម្រួល ឈូក បូរ៉ា
