ភ្នំពេញ ៖ តបតាមការអញ្ជើញ ពីភាគីចក្រភពអង់គ្លេស លោកបណ្ឌិត លី ធុជ ទេសរដ្ឋមន្រ្តី អនុប្រធានទី១ អាជ្ញាធរមីន និងជាប្រធាន អនុសញ្ញាអូតាវ៉ា ឆ្នាំ២០២៤ នៅថ្ងៃទី២៤ ខែមិថុនា ឆ្នាំ២០២៤ បានអញ្ជើញចូលរួម និងថ្លែងសុន្ទរកថា ក្នុងកម្មវិធីបើកកិច្ចពិភាក្សាកម្រិតនយោបាយនៅ Wilton Park ទីក្រុងឡុងដ៏ ចក្រភពអង់គ្លេស ដើម្បីធានាភាពជោគជ័យ នៃកិច្ចប្រជុំត្រួតពិនិត្យឡើងវិញ លើកទី៥ឬកិច្ចប្រជុំកំពូល សៀមរាប-អង្គរ ស្តីពីពិភពលោកមួយ ដែលគ្មានមីន នៃអនុសញ្ញាហាមការប្រើប្រាស់មីន ប្រឆាំងមនុស្ស (អនុសញ្ញាអូតាវ៉ា)។
![](https://dap-news.com/wp-content/uploads/2024/06/photo_2024-06-25_16-53-47-1-1024x768.jpg)
ក្នុងនាមកម្ពុជា ជាប្រធានអនុសញ្ញាអូតាវ៉ាឆ្នាំ២០២៤ និងជាម្ចាស់ផ្ទះ នៃកិច្ចប្រជុំកំពូលសៀមរាប-អង្គរ លោកបណ្ឌិត លី ធុជ បានប្តេជ្ញាចិត្តមិនផ្លាស់ប្តូរ ចំពោះបេសកកម្មរួម ស្មារតីនៃសាមគ្គីភាពអន្តរជាតិ និងការខិតខំប្រឹងប្រែងឥតឈប់ឈរនៃសន្តិភាព និងសុវត្ថិភាពសម្រាប់មនុស្សជាតិទាំងអស់ ដើម្បីឆ្ពោះទៅកាន់ពិភពលោក ដែលមិនមានគ្រោះមហន្តរាយដោយសារគ្រាប់មីន និងស្ដារឡើងវិញ នូវក្តីសង្ឃឹមដល់សហគមន៍ ដែលត្រូវបានបំផ្លិចបំផ្លាញ ដោយសំណល់នៃសង្រ្គាម។
![](https://dap-news.com/wp-content/uploads/2024/06/photo_2024-06-25_16-53-55-1024x768.jpg)
![](https://dap-news.com/wp-content/uploads/2024/06/photo_2024-06-25_16-53-59-768x1024.jpg)
ក្នុងឱកាសនោះ លោកបណ្ឌិត លី ធុជ បានថ្លែងអំណរគុណ ជូនចំពោះការិយាល័យការបរទេស Commonwealth និងអភិវឌ្ឍន៍នៃចក្រភពអង់គ្លេស សម្រាប់ការគាំទ្រ និង ការផ្តល់នូវវេទិកានេះ នៅ Wilton Park ក្នុងការដោះស្រាយបញ្ហាប្រឈម សំខាន់ៗ មួយចំនួនរបស់ពិភពលោក និងជាកន្លែង ប្រវត្តិសាស្ត្រ សម្រាប់កិច្ចសន្ទនា ផ្លាស់ប្តូរ និងកិច្ចសហប្រតិបត្តិការជាសកល ។ ចក្រភពអង់គ្លេស គឺ ជាអ្នកគាំទ្រយ៉ាងសកម្ម នៃសកម្មភាពមីន នៅទូទាំងពិភពលោក ដោយជំរុញកិច្ចខិតខំប្រឹងប្រែង ដើម្បីលុបបំបាត់សំណល់ នៃសង្គ្រាម និងស្ដារសុវត្ថិភាព ដល់សហគមន៍ដែលរងផលប៉ះពាល់។ ចក្រភពអង់គ្លេស បានដើរតួនាទី យ៉ាងសំខាន់ ក្នុងការតស៊ូមតិសម្រាប់ការគាំទ្រអន្តរជាតិ និងផ្តល់មូល និធិដល់កិច្ចខិតខំប្រឹងប្រែង ដោះមីនមនុស្សធម៌ ។ ការលះបង់និងការគាំទ្រ របស់ចក្រភពអង់គ្លេស បានចូលរួមចំណែកយ៉ាងសំខាន់ ក្នុងការធ្វើឱ្យពិភពលោកកាន់តែមានសុវត្ថិភាព ដោយផ្លាស់ប្តូរជីវិត របស់មនុស្សរាប់មិនអស់ ។
![](https://dap-news.com/wp-content/uploads/2024/06/photo_2024-06-25_16-53-51-1024x768.jpg)
លោកបណ្ឌិត លី ធុជ បានលើកឡើងថា កិច្ចពិភាក្សាកម្រិត នយោបាយនៅ Wilton Park នឹងកំណត់នូវមូលដ្ឋាន គ្រឹះសម្រាប់ការរៀបចំផែនការ សកម្មភាពសៀមរាប -អង្គរដែលជាផែនការសកម្មភាព ដឹកនាំកិច្ចខិតខំប្រឹងប្រែង សកម្មភាពមីនសកល និងជាគោលដៅ ដើម្បីត្រួសត្រាយផ្លូវ សម្រាប់ផែនការ សកម្មភាពដ៏រឹងមាំ ជំរុញគោលបំណង នៃអនុសញ្ញាក្នុងរយៈពេលប្រាំឆ្នាំខាងមុខ ៕
![](https://dap-news.com/wp-content/uploads/2020/08/1-1.png)