ការ៉ាកាស៖ ប្រជាជនវេណេស៊ុយអេឡា បានទៅការិយាល័យបោះឆ្នោត នៅទូទាំងប្រទេស ហើយបានបោះឆ្នោតកាលពីថ្ងៃអាទិត្យ ក្នុងការបោះឆ្នោត ជ្រើសរើសប្រធានាធិបតីថ្មី របស់ខ្លួន នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកស្រី Aime Nogal Mendez សមាជិកក្រុមប្រឹក្សាជាតិរៀបចំការបោះឆ្នោត (CNE) បានឲ្យដឹងថា លោកស្រី បានចុះពិនិត្យនៅតាមការិយាល័យ មជ្ឈមណ្ឌលបោះឆ្នោត” តាំងពីព្រឹកថ្ងៃអាទិត្យ។
គណនីផ្លូវការរបស់ CNE នៅលើប្រព័ន្ធផ្សព្វផ្សាយសង្គម X បានបំភ្លឺថា តាមច្បាប់ អ្នកបោះឆ្នោតត្រូវតែបង្ហាញអត្តសញ្ញាណប័ណ្ណរបស់ពួកគេ ដើម្បីបោះឆ្នោត ទោះបីជាវាផុតកំណត់ក៏ដោយ។ ច្បាប់ចែងថា ការិយាល័យបោះឆ្នោតនឹងបើកពីម៉ោង ៦ព្រឹក ដល់ម៉ោង ៦ល្ងាច ហើយនឹងនៅតែបើកចំហ ដរាបណាមានមនុស្សរង់ចាំបោះឆ្នោត។
ប៉ុន្មាននាទីបន្ទាប់ពីដំណើរការបោះឆ្នោតបានចាប់ផ្តើម ប្រធានាធិបតីវេណេស៊ុយអេឡា លោក នីកូឡា ម៉ាឌូរ៉ូ ដែលកំពុងតែស្វែងរកអាណត្តិទី៣ របស់លោក បានបោះឆ្នោតនៅ Fuerte Tiuna រដ្ឋការ៉ាកាស។ លោកថា ការបោះឆ្នោតបានចាប់ផ្តើមដោយសន្តិវិធី និងបានអំពាវនាវឲ្យមានចំនួនអ្នកទៅបោះឆ្នោតខ្ពស់។
លោក ម៉ាឌូរ៉ូ បានប្រាប់ប្រព័ន្ធផ្សព្វផ្សាយថា “ខ្ញុំប្រាកដថាអ្វីៗនឹងដំណើរការល្អ ហើយថ្ងៃស្អែកនឹងក្លាយជាថ្ងៃដ៏ស្រស់ស្អាត” ។
លោកបានលើកឡើងថា “ការគោរពដំណើរការបោះឆ្នោត គឺជាការគោរពរដ្ឋធម្មនុញ្ញ” ដោយលើកឡើងពីតម្រូវការ សម្រាប់កម្លាំងនយោបាយ ដែលចូលរួមទាំងអស់ គោរពសិទ្ធិអំណាចបោះឆ្នោត និងទទួលស្គាល់លទ្ធផលផ្លូវការរបស់ក្រុមប្រឹក្សាជាតិរៀបចំការបោះឆ្នោត។
លោក ម៉ាឌូរ៉ូ កំពុងឈរឈ្មោះប្រកួតប្រជែងនឹងបេក្ខជនប្រធានាធិបតីទាំង ៩រូបផ្សេងទៀង។ ក្នុងចំណោមបេក្ខជនទាំងអស់ លោក Edmundo Gonzalez ដែលជាអ្នកការទូតចូលនិវត្តន៍ ត្រូវបានគេមើលឃើញថា ជាបញ្ហាប្រឈមដ៏សំខាន់ចំពោះលោក ម៉ាឌូរ៉ូ៕
ប្រែសម្រួល ឈូក បូរ៉ា
