បរទេស ៖ យោងតាមការចេញផ្សាយ របស់ RT បណ្តាញសង្គម ចែករំលែកវីដេអូ ដ៏ល្បីល្បាញ TikTok បានលុបគណនីជាភាសា អារ៉ាប់ ចំនួនបីរបស់កាសែត RT របស់ប្រទេសរុស្សី ដោយគ្មានការពន្យល់។
ប្រភពដដែលបានសរសេរទៀតថា វិធានការនេះធ្វើឡើងខណៈជម្លោះអ៊ីស្រាអែល និងហេសបូឡាបានជំរុញឱ្យមានការភ័យខ្លាចនៃការកើនឡើងក្នុងតំបន់ ។
គួរឲ្យដឹងដែរថាគណនីរបស់កាសែត RT ទាំងជាភាសាអារ៉ាប់, RT Online និង RT Newsroom បានបាត់ចេញពី TikTok តាំងតែពីល្ងាចថ្ងៃអង្គារ។
ការបង្រ្កាបនេះ បានធ្វើឡើងបន្ទាប់ពីទីក្រុងវ៉ាស៊ីនតោន បានដាក់ទណ្ឌកម្មលើក្រុមហ៊ុន RT និងសារព័ត៌មាន របស់រុស្ស៊ីមួយចំនួនទៀត ដោយចោទប្រកាន់ពួកគេដំណើរការជា អាវុធសម្រាប់ធ្វើចារកម្មឲ្យរុស្ស៊ី ហើយបានចោទ ប្រកាន់ពួកគេថាធ្វើការដើម្បី បំផ្លាញលទ្ធិប្រជាធិបតេយ្យ ដោយសម្ងាត់នៅក្នុងសហរដ្ឋអាមេរិក និងកន្លែងផ្សេងទៀត។
យ៉ាងណាក្តីប្រទេសរុស្ស៊ី បានថ្កោលទោស ទណ្ឌកម្មអាមេរិកថា ជាការឈ្លានពានយ៉ាងអាក្រក់ ហើយការចោទប្រកាន់របស់អាមេរិកថាជារឿង ដែលមិនអាចទទួលយកបាននិង គ្មានមូលដ្ឋានសមរម្យនោះទេ៕
ប្រែសម្រួល៖ស៊ុនលី
