ភ្នំពេញ ៖ លោក ញៀន ភឿន រដ្ឋលេខាធិការនៃក្រសួងធម្មការ និងសាសនា និងជា សមាជិកគណៈកម្មាធិការជាតិ រៀបចំបុណ្យជាតិ និងអន្តរជាតិ បានណែនាំឲ្យប្រជាពលរដ្ឋរៀបចំ រណ្តាប់ទទួលទេវតាឆ្នាំថ្មី ទៅតាមទំនៀមទំលាប់ជាធម្មតា ដែលប្រារព្ធឡើងជារៀងរាល់ឆ្នាំ ដើម្បីជំរុញថែរក្សា ប្រពៃណីវប្បធម៌ជាតិ ។ នេះបើយោងតាមការចេញផ្សាយ របស់ក្រសួងព័ត៌មាន កាលពីថ្ងៃទី៣១ មីនា ។
លោក ញៀន ភឿន បានថ្លែងថា មហាសង្រ្កាន្តឆ្នាំជូត ទោស័កព្រះពុទ្ធសករាជ ២៥៦៤ នឹងចូលមកដល់ នៅវេលាម៉ោង២០:៤៨នាទីយប់ ថ្ងៃចន្ទ័ ៦រោច ខែចែត្រ ត្រូវនឹងថ្ងៃទី១៣ ខែមេសា គ្រិស្តសករាជ ២០២០។ លោកបន្ដថា ដោយបុណ្យចូលឆ្នាំថ្មី ត្រូវនឹងថ្ងៃចន្ទ គឺត្រូវវេណរបស់ ទេពធីតាមួយព្រះអង្គ ជាមគ្គនាយិកាព្រះនាម គោរាគទេវី ជាបុត្រីទី២ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌លឿង លម្អនូវព្រះកាណ៌ ដោយសៀតផ្កាអង្គាបុស្ប អាភរណៈទ្រង់ពាក់កែវមុក្តា ភក្សាហារទ្រង់សោយតេលំ ទ្រង់អាវុធព្រះហស្តស្តាំទ្រង់ព្រះខ័ន ព្រះហស្តឆ្វេងទ្រង់យដ្ឋិ គង់ផ្ទំបើកព្រះនេត្រលើខ្នង ព្យគ្ឃ ជាពាហនៈ។
លោករៀបរាប់ថា គ្រឿងរណ្តាប់ ទទួលទេវត្តាឆ្នាំថ្មីនេះមាន ដូចជា បាយសី ១គូ ,ស្លាធម៌ ១គូ ,ធូប៥ ,ទៀន៥ ,ទឹកអប់ ១គូ ,ផ្កាភ្ញី ,លាជ ,ទឹក១ផ្តិល ,ភេសជ្ជៈ និងនំនែក ផ្លែឈើគ្រប់មុខ។
លោកថា ក្នុងឱកាសឆ្នាំនេះ ពលរដ្ឋទូទៅអាចនាំគ្នារៀបចំបាយ ម្ហូប សំលៀកបំពាក់ និងថវិកាផ្ទាល់ខ្លួន ជូនឪពុកម្តាយ និងសាច់ញ្ញាតិបងប្អូន ឬ រៀបចំចង្ហាន់ផ្សេងៗប្រគេនព្រះសង្ឃ ដោយពុំចាំបាច់មានមនុស្ស ចូលរួមអ៊ូអរច្រើនឡើយ។ ក្នុងន័យកាត់បន្ថយ ការរីករាលដាលនៃជំងឺកូវីដ-១៩ និងរំលឹកនឹកគុណដល់អ្នក ដែលមានគុណ និងគ្រូបាធ្យាយ ជាដើម។
លោក មានប្រសាសន៍ថា «ចូលដល់ឆ្នាំថ្មី យើងត្រូវជម្រះ នូវឧបទ្រពចង្រៃគ្រប់បែបយ៉ាង ដូចជា មានចិត្តជាអកុសល សព្វគ្រប់បែបយ៉ាង ដែលមានកន្លងមកយើងត្រូវជម្រះចេញឆ្នាំថ្មី យើងត្រូវធ្វើឲ្យបានល្អ លក្ខណៈល្អប្រពៃ នៃព្រះពុទ្ធសាសនារបស់យើង សំខាន់ជាងគេដែល ក្នុងនោះទី ១ទក្ខិណានុប្បទានឧទ្ទិសកុសល ដល់បុព្វការីជនមានមាតាបិតាជីដូនជីតា ទាំង ៧សន្តាន ដែលលោករំលាយក្ខន្ធ ទៅកាន់លោកខាងមុខហើយ ហើយកូនចៅត្រូវមានការដឹងគុណ ចំពោះបុព្វការីជន មាតា បិតា គ្រូឧប្ឈាយាចារ្យ ជាដើមនេះ។
សូមបញ្ជាក់ថា ពិធីបុណ្យប្រពៃណិជាតិ តែងធ្វើជារៀងរាល់ឆ្នាំនៅ ខែចែត្រ ជាខែដែលប្រជាជន ខ្មែរទំនេរពីការងារស្រែចំ ការតែងតែមកជួបជុំគ្នា ម្យ៉ាងទៀត រយៈពេលមួយឆ្នាំ ពួកគេបានបែកចេញពី គ្រួសារ និង ញាតិមិត្ដ ទៅប្រករបរចិញ្ចឹមជិវិតនៅទីឆ្ងាយៗ លុះដល់ឆ្នាំថ្មី គេបានវិលមកជូបជុំគ្នា សួរសុខទុក្ខគ្នា ដើម្បីបន្ថូរការនឹករឭក និងបំបាត់ការនឿយហត់ពីការងារ ពិសេសការតបគុណ ចំពោះមាតាបិតា និងអ្នកដែលមានគុណ៕
