ព្រុចសែល៖ មេដឹកនាំនៃប្រទេសទាំងប្រាំបួននៃសហភាពអឺរ៉ុបមេឌីទែរ៉ាណេ ដែលគេស្គាល់ថា Med9 បានអំពាវនាវឱ្យមានបទឈប់បាញ់ភ្លាមៗនៅតំបន់មជ្ឈិមបូព៌ា និងបានជំរុញឱ្យមានការបន្តកិច្ចខិតខំប្រឹងប្រែងការទូត ដើម្បីដោះស្រាយជម្លោះដែលកំពុងបន្តនៅក្នុងតំបន់ក្នុងអំឡុងពេលកិច្ចប្រជុំកំពូលរបស់ពួកគេកាលពីថ្ងៃសុក្រ។
នៅចុងបញ្ចប់នៃកិច្ចប្រជុំកំពូល Med9 លើកទី១១ ដែលបានធ្វើឡើងនៅទីក្រុង Paphos ភាគខាងលិចប្រទេស Cypriot មេដឹកនាំទាំងអស់បានឲ្យដឹងនៅក្នុងសេចក្តីថ្លែងការណ៍មួយថា “ស្ថានភាពដែលកំពុងកើតឡើងនៅមជ្ឈិមបូព៌ា គឺគួរឱ្យព្រួយបារម្ភយ៉ាងខ្លាំង ដោយទាមទារឱ្យមាន “បទឈប់បាញ់ជាបន្ទាន់” និងការផ្តល់ជំនួយមនុស្សធម៌យ៉ាងឆាប់រហ័សទៅប្រទេសលីបង់។
មេដឹកនាំ Med9 បានឲ្យដឹងនៅក្នុងសេចក្តីថ្លែងការណ៍របស់ពួកគេបន្ទាប់ពីកិច្ចប្រជុំពេញមួយថ្ងៃថា “យើងជំរុញឱ្យតួអង្គទាំងអស់អនុវត្តការអត់ធ្មត់ និងចូលរួមក្នុងកិច្ចខិតខំប្រឹងប្រែងសម្របសម្រួល ដើម្បីលុបបំបាត់ភាពតានតឹង” ។
ក្រុមនេះក៏បានអះអាងជាថ្មីនូវការគាំទ្ររបស់ខ្លួនចំពោះរាល់ដំណោះស្រាយរបស់អង្គការសហប្រជាជាតិ ទាក់ទងនឹងតំបន់មជ្ឈិមបូព៌ា ហើយបានសន្យាថា នឹងធ្វើការរួមគ្នាដើម្បីមានឥទ្ធិពលលើគោលនយោបាយរបស់អឺរ៉ុប កាន់តែទូលំទូលាយលើបញ្ហាក្នុងតំបន់។
សេចក្តីប្រកាសបានបន្ថែមថា ប្រឆាំងនឹងផ្ទៃខាងក្រោយនៃជម្លោះកាន់តែខ្លាំងឡើងនៅមជ្ឈិមបូព៌ា សង្រ្គាមរុស្ស៊ី-អ៊ុយក្រែន និងសម្ពាធនយោបាយ សេដ្ឋកិច្ច និងសង្គមជាប់លាប់ ទម្រង់ការសម្របសម្រួលក្នុងតំបន់នេះ គឺមានសារៈសំខាន់ក្នុងការរៀបចំការឆ្លើយតបរបស់អឺរ៉ុបចំពោះបញ្ហាប្រឈមរួម។
ប្រទេស Cyprus ដែលបច្ចុប្បន្នកាន់តំណែងជាប្រធាននៃក្រុម Med9 បានធ្វើជាម្ចាស់ផ្ទះនៃកិច្ចប្រជុំកំពូលនេះ ដោយមានការចូលរួមពីប្រមុខរដ្ឋ ឬរដ្ឋាភិបាលមកពីប្រទេសបារាំង ក្រិក អ៊ីតាលី ក្រូអាស៊ី ម៉ាល់តា ស្លូវេនី និងអេស្ប៉ាញ ខណៈដែលព័រទុយហ្គាល់ត្រូវបានតំណាងដោយរដ្ឋមន្ត្រីការបរទេសរបស់ខ្លួន ហើយប្រធានគណៈកម្មការអឺរ៉ុបលោកស្រី Ursula von der Leyen ក៏បានចូលរួមផងដែរ៕
ប្រែសម្រួល៖ ឈូក បូរ៉ា
