រ៉ាម៉ាឡា៖ មន្ត្រីប៉ាឡេស្ទីនបានថ្កោលទោសផែនការរបស់អ៊ីស្រាអែល ក្នុងការដណ្តើមយកទីស្នាក់ការកណ្តាលក្រុងហ្សេរុយសាឡឹមខាងកើតនៃទីភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) ហើយបំប្លែងទីតាំងនេះទៅជាការតាំងទីលំនៅដោយហៅការផ្លាស់ទីនេះថាខុសច្បាប់ និង ការបំពានច្បាប់អន្តរជាតិ។
លោក Ahmad Abu Holi សមាជិកនៃគណៈកម្មាធិការប្រតិបត្តិរបស់អង្គការរំដោះប៉ាឡេស្ទីន និងជាប្រធាននាយកដ្ឋានកិច្ចការជនភៀសខ្លួនបានបរិហារការសម្រេចចិត្តនេះថាជាគំរូ “គ្រោះថ្នាក់” ដោយព្រមានថា វាជាគំរូដ៏គួរឱ្យព្រួយបារម្ភមួយនៃរដ្ឋសមាជិកអង្គការសហប្រជាជាតិពេញលេញ ដែលធ្វើសកម្មភាពប្រឆាំងនឹងទីភ្នាក់ងារអង្គការសហប្រជាជាតិ។
នៅក្នុងសេចក្តីថ្លែងការណ៍មួយ លោក Abu Holi បានរិះគន់ការខ្វះខាតសកម្មភាពអន្តរជាតិ ដើម្បីទប់ស្កាត់គោលនយោបាយរបស់អ៊ីស្រាអែល ដោយលើកហេតុផលថា អ៊ីស្រាអែល មិនយកចិត្តទុកដាក់លើប្រព័ន្ធសកល និងបន្តការរំលោភច្បាប់អន្តរជាតិ។
លោកបានចោទប្រកាន់រដ្ឋាភិបាលអ៊ីស្រាអែលថាកំពុងស្វែងរកការធ្វើឱ្យខូចដល់អាណត្តិរបស់ UNRWA ដោយមានបំណងរុះរើទីភ្នាក់ងារនេះ ដោយសារតែតួនាទីរបស់ខ្លួនក្នុងការការពារសិទ្ធិជនភៀសខ្លួនប៉ាឡេស្ទីន។
ក្រសួងការបរទេស និងជនបរទេសប៉ាឡេស្ទីន ក៏បានថ្កោលទោសទង្វើរបស់អ៊ីស្រាអែល ដោយពណ៌នាថា ជាការបំពានយ៉ាងម៉ឺងម៉ាត់ ចំពោះដំណោះស្រាយរបស់អង្គការសហប្រជាជាតិ និងការប៉ុនប៉ងលុបបំបាត់បញ្ហាជនភៀសខ្លួន។
ក្រសួងបានសង្កត់ធ្ងន់ថា យុទ្ធនាការរបស់អ៊ីស្រាអែលប្រឆាំងនឹង UNRWA ឆ្លុះបញ្ចាំងពី “អរិភាពដែលបានគិតទុកជាមុន” ឆ្ពោះទៅរកជនភៀសខ្លួនប៉ាឡេស្ទីន និងសិទ្ធិវិលត្រឡប់របស់ពួកគេ ដោយផ្តោតលើមិនត្រឹមតែទីស្នាក់ការរបស់ទីភ្នាក់ងារប៉ុណ្ណោះទេ ថែមទាំងបុគ្គលិក និងប្រតិបត្តិការរបស់ខ្លួនទៀតផង៕
ប្រែសម្រួល៖ ឈូក បូរ៉ា
