បរទេស៖ យោងតាមការចេញផ្សាយរបស់ RT កងកម្លាំងការពារអ៊ីស្រាអែលហៅកាត់ថា IDF បានប្រកាសថា ខ្លួនបានសម្លាប់អ្នកស្នងតំណែងបន្តពីមេដឹកនាំ Hezbollah លោក Hassan Nasrallah នៅក្នុងការវាយប្រហារតាមអាកាស កាលពីដើមខែនេះ។
កងកម្លាំងIDF បាននិយាយថាលោក Hashem Safieddine ត្រូវបានគេសម្លាប់នៅក្រុងបេរូតជាមួយ នឹងប្រធានស៊ើបការណ៍សម្ងាត់របស់ក្រុម។
IDF បាននិយាយនៅក្នុងសេចក្តីថ្លែងការណ៍មួយថា ៖ឥឡូវនេះយើងអាចបញ្ជាក់បានថា នៅក្នុងការវាយប្រហារប្រហែលបីសប្តាហ៍មុនលោក Hashem Safieddine ប្រធានក្រុមប្រឹក្សាប្រតិបត្តិរបស់ក្រុម Hezbollah និងលោក Ali Hussein Hazima ដែលជាប្រធាននាយកដ្ឋានស៊ើបការណ៍សម្ងាត់របស់ក្រុម Hezbollah ត្រូវបានសម្លាប់រួមជាមួយមេបញ្ជាការ Hezbollah ផ្សេងទៀតទៅហើយ។
គួរឲ្យដឹងដែរថា ការវាយប្រហារនេះ បានកើតឡើងកាលពីថ្ងៃទី ៤ ខែតុលា នៅជាយក្រុងបេរូតនៃក្រុង Dahieh ជាតំបន់ដែលសម្បូរដោយក្រុម Shia និងបន្ទាយធំរបស់ Hezbollah។
IDF បាននិយាយថា យន្តហោះអ៊ីស្រាអែលបានបាញ់មីស៊ីល ទៅកាន់ទីស្នាក់ការចារកម្មក្រោមដីរបស់ Hezbollah ដែលមានទីតាំងនៅតំបន់ជនស៊ីវិលនៃទីក្រុង Dahieh ។ IDF បានបន្ថែមថាភេរវករប្រមាណជា ២៥នាក់ ស្ថិតនៅក្នុងទីស្នាក់ការកណ្តាល នៅពេលនៃការវាយប្រហារនោះផងដែរ៕
ប្រែសម្រួល៖ ស៊ុន លី
