ចិន៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា លោកស្រី Chen Lihua ដែលជាមហាសេដ្ឋីជំនួញ និងជាភរិយារបស់តារាសម្តែងចិនលោក Chi Zhongrui ត្រូវបានគេស្គាល់ថាជាតួ Tang Sanzang ក្នុងរឿង “Journey to the West” មានទ្រព្យសម្បត្តិប៉ាន់ស្មានចំនួន ៥៥ ពាន់លានយន់ ស្មើនឹង ៧.៧ ពាន់លានដុល្លារ។
លោកស្រី Chen ជាប់ចំណាត់ថ្នាក់ទី ៦៨ ក្នុងបញ្ជីអ្នកមានបំផុតទាំង ១០០ នៅប្រទេសចិនរបស់វិទ្យាស្ថានស្រាវជ្រាវ Hurun ដោយបានចេញផ្សាយនៅថ្ងៃទី ២៩ ខែតុលា។ ទ្រព្យសម្បត្តិរបស់លោកស្រីបានមកពីអចលនទ្រព្យ និងសារមន្ទីរ Red Sandalwood ។
នេះបើយោងតាម Sina បានប្រាប់ឲ្យដឹងថា ក្នុងឆ្នាំ ២០១៦ លោកស្រី Chen ត្រូវបានគេទទួលស្គាល់ថា ជាស្ត្រីមានបំផុតរបស់ប្រទេសចិន ហើយនៅតែជាតួលេខដ៏សំខាន់ក្នុងចំណោមមហាសេដ្ឋីចិន បើទោះបីជាទ្រព្យសម្បត្តិសុទ្ធរបស់ លោកស្រីធ្លាក់ចុះនាពេលថ្មីៗនេះក៏ដោយ។
អាជីពរបស់លោកស្រីបានចាប់ផ្តើមនៅឆ្នាំ ១៩៩៦ ជាមួយនឹងការបង្កើតក្លឹប Changan ជាកន្លែងអាជីវកម្មប្រណីតនៅជិត ទីលានធានអានមេនក្នុងទីក្រុងប៉េកាំង។ ត្រូវបានគេស្គាល់ថា ជា Premium Club ដំបូងគេរបស់ចិនដីគោក តម្លៃសមាជិកភាពប្រចាំឆ្នាំរបស់ក្លិប គឺប្រហែល ១៧០,០០០យន់ ស្មើនឹង២៣,៨៦៤ ដុល្លារ ហើយត្រូវបានបើកសម្រាប់តែ២ឬ៣ នាក់ប៉ុណ្ណោះដែលជ្រើសរើស រួមទាំងមហាសេដ្ឋីផ្សេងទៀតផងដែរ។
លោកស្រី Chen ក៏បានកសាងទ្រព្យសម្បត្តិ របស់នាងតាមរយៈការអភិវឌ្ឍន៍ អចលនទ្រព្យនៅតាមបណ្តោយផ្លូវ Jinbao ក្នុងទីក្រុងប៉េកាំង។ ផ្សារទំនើបដែលបង្កើតឡើងដោយក្រុមហ៊ុន របស់លោកស្រីមានម៉ាកយីហោប្រណីត លំដាប់អន្តរជាតិជាច្រើន។
ក្នុងប៉ុន្មានឆ្នាំថ្មីៗនេះ ការយកចិត្តទុកដាក់ជាសាធារណៈ បានផ្តោតលើរបៀបដែលលោកស្រី Chen មានបំណងបែងចែកទ្រព្យសម្បត្តិរបស់លោកស្រី។ ពាក្យចចាមអារ៉ាមដែលផ្សព្វផ្សាយ នៅលើប្រព័ន្ធផ្សព្វផ្សាយសង្គមបានបង្ហាញថា លោកស្រីអាចទុកប្រាក់ ១៨ ពាន់លានយន់ ស្មើនឹង ២.៥ ពាន់លានដុល្លារ) ទៅប្តីរបស់លោកស្រី។ ទោះជាយ៉ាងណាក៏ដោយ លោកស្រី Chen មិនបានពិភាក្សាជាសាធារណៈ អំពីផែនការមរតករបស់លោកស្រី ឬធ្វើអត្ថាធិប្បាយលើការរំពឹងទុកទាំងនេះទេ ៕
