ប៉ារីស៖ នៅថ្ងៃពុធនេះ លោក Emmanuel Macron ប្រធានាធិបតីបារាំង បានអបអរសាទរចំពោះលោក ដូណាល់ ត្រាំ បន្ទាប់ពីបេក្ខជនប្រធានាធិបតីមកពី គណបក្សសាធារណរដ្ឋរបស់សហរដ្ឋអាមេរិក បានប្រកាសអំពីជ័យជម្នះ ។
លោក Macron បានសរសេរនៅលើវេទិកា ប្រព័ន្ធផ្សព្វផ្សាយសង្គម X យ៉ាងដូច្នេះថា “ត្រៀមខ្លួនរួចជាស្រេចដើម្បីធ្វើការ ជាមួយគ្នាដូចដែលយើងបាន ធ្វើកាលពីមុនអស់រយៈពេល៤ឆ្នាំ។ ជាមួយនឹងការជឿជាក់របស់អ្នក និងរបស់ខ្ញុំ ។ ដោយការគោរព និងមហិច្ឆតា ដើម្បីសន្តិភាព និងវិបុលភាពបន្ថែមទៀត” ។
លោក Macron បានថ្លែងថា លោកក៏បានថ្លែងទៅកាន់លោក Olaf Scholz អធិការបតីអាល្លឺម៉ង់ បន្ទាប់ពីសុន្ទរកថា នាពេលរាត្រីបោះឆ្នោតរបស់លោក ត្រំា ទៅកាន់អ្នកគាំទ្រ ។
លោក Macron បានសរសេរនៅលើទំព័រសង្គម X ថា ប្រទេសបារាំង និងអាល្លឺម៉ង់ “នឹងធ្វើការឱ្យមានភាពរួបរួមគ្នា កាន់តែរឹងមាំ និងកាន់តែមានអធិបតេយ្យភាពអឺរ៉ុប នៅក្នុងបរិបទថ្មីនេះ ដោយសហការជាមួយសហរដ្ឋអាមេរិក និងការពារផលប្រយោជន៍ និងតម្លៃរបស់យើង” ។
លោក ត្រាំ បានប្រកាសអំពីជ័យជម្នះនៅព្រឹកថ្ងៃពុធ នៅក្នុងការបោះឆ្នោតប្រធានាធិបតីសហរដ្ឋអាមេរិក ឆ្នាំ២០២៤ ខណៈសារព័ត៌មាន Fox News បានព្យាករណ៍ថា គាត់ទទួលបានការបោះឆ្នោតជ្រើសរើសចំនួន ២៧៧មណ្ឌលបោះឆ្នោត ។
គួរបញ្ជាក់ថា យ៉ាងហោចណាស់ត្រូវមានមណ្ឌល បោះឆ្នោតចំនួន២៧០ ត្រូវការការបោះឆ្នោតដើម្បី ដណ្តើមតំណែងប្រធានាធិបតីអាមេរិក ៕
ប្រែសម្រួលដោយ៖ ម៉ៅ បុប្ផាមករា
