សេអ៊ូល៖ ក្រសួងការបរទេសបានឲ្យដឹងថា ប្រេសិតនុយក្លេអ៊ែរកំពូលរបស់កូរ៉េខាងត្បូង និងសហរដ្ឋអាមេរិក បានធ្វើកិច្ចចរចាតាមទូរស័ព្ទ កាលពីថ្ងៃព្រហស្បតិ៍ជុំវិញ បញ្ហានុយក្លេអ៊ែររបស់កូរ៉េខាងជើង និងកិច្ចខិតខំប្រឹងប្រែងរួមគ្នា ដើម្បីសន្តិភាពយូរអង្វែងនៅឧបទ្វីបនេះ។
លោក Lee Do-hoon អ្នកតំណាងពិសេសរបស់ក្រសួងទទួលបន្ទុកកិច្ចការសន្តិភាព និងសន្តិសុខនៅឧបទ្វីបកូរ៉េ និងលោក Stephen Biegun តំណាងពិសេសរបស់សហរដ្ឋអាមេរិកប្រចាំនៅកូរ៉េខាងជើង និងជាអនុរដ្ឋលេខាធិការបានជជែកគ្នាតាមទូរស័ព្ទនៅក្នុងការបង្ហាញពីការបន្តសម្របសម្រួលរបស់ពួកគេ លើកិច្ចខិតខំប្រឹងប្រែងសន្តិភាព។
ការសន្ទនានេះបានកើតឡើងចំពេលមានភាពតានតឹងដែលបណ្តាលមកពីការសាកល្បងរ៉ុក្កែតរយៈចម្ងាយខ្លីរបស់កូរ៉េខាងជើង និងការជាប់គាំងក្នុងការចរចានុយក្លេអ៊ែររវាងទីក្រុងវ៉ាស៊ីនតោន និងព្យុងយ៉ាង៕ដោយ ឈូក បូរ៉ា
