ប៉េកាំង៖ ទោះបីជាមានការប្រឈមកាន់តែខ្លាំងក៏ដោយ ពាណិជ្ជកម្មរវាងចិន និងសហភាពអឺរ៉ុបបានបង្ហាញពី ភាពធន់របស់ខ្លួននៅឆ្នាំ២០២៤ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
សម្រាប់ភាគច្រើននៃឆ្នាំ២០២៤ ជម្លោះរថយន្តអគ្គិសនី (EV) បានថ្លឹងថ្លែងយ៉ាងខ្លាំង ទៅលើទំនាក់ទំនងសេដ្ឋកិច្ច និងពាណិជ្ជកម្មរវាងប្រទេសចិន និងសហភាពអឺរ៉ុប។
ទំនាក់ទំនងដែលត្រូវបានសម្គាល់ដោយការប៉ះទង្គិច និងការពឹងពាក់គ្នាទៅវិញទៅមក បានធ្វើឱ្យមហាអំណាចទាំងពីរ ស្វែងរកផ្លូវមិនច្បាស់លាស់មួយ ហើយចាំបាច់ត្រូវការស្វែងរកមូលដ្ឋានរួមគ្នា ទោះបីជាភាពមិនប្រាកដប្រជាកើតឡើងក៏ដោយ។
អ្វីដែលបានចាប់ផ្តើម ជាការស៊ើបអង្កេតរបស់អឺរ៉ុប នៅចុងឆ្នាំ២០២៣ បានឈានទៅដល់ការប៉ះទង្គិចរយៈពេល មួយឆ្នាំជាមួយនឹងពន្ធបន្ថែមដែលអឺរ៉ុប ដាក់លើរថយន្ត EV ដែលផលិតដោយចិន។ ទោះបីជាយ៉ាងណាក៏ដោយ ជាមួយនឹងការចរចានៅតែបន្ត វាច្បាស់ណាស់ថា ភាគីទាំងសងខាងមិនត្រៀមខ្លួនជាស្រេច ក្នុងការបោះបង់ការស្វែងរកផ្លូវ ឆ្ពោះទៅមុខនោះទេ។
ក្រុមហ៊ុនផលិតរថយន្តចិន ធ្លាប់បានចាត់ទុកអឺរ៉ុបថា ជាទីផ្សារបើកចំហនិងមានជោគជ័យ ហើយវិធានការមិនមែន ទីផ្សាររបស់សហភាពអឺរ៉ុប កំពុងបំផ្លាញទំនុកចិត្តរបស់ពួកគេ។
របាយការណ៍ដែលបានចេញផ្សាយ កាលពីថ្ងៃច័ន្ទដោយសភាពាណិជ្ជកម្មចិន ទៅកាន់សហភាពអឺរ៉ុប (CCCEU) ដោយភាពជាដៃគូជាមួយទីប្រឹក្សាសកលលោក Roland Berger គូររូបភាពនៃទំនាក់ទំនងដ៏តឹងតែង និងការកើនឡើងភាពមិនសុខស្រួល ក្នុងចំណោមអាជីវកម្មចិន ដែលកំពុងប្រតិបត្តិការនៅក្នុងប្លុកនេះ។
របាយការណ៍នេះផ្អែកលើ ការស្ទង់មតិរយៈពេល ៤ខែ និងការសម្ភាសន៍ស៊ីជម្រៅ ជាមួយអាជីវកម្មចិនប្រហែល ២០០ នៅក្នុងសហភាពអឺរ៉ុប បានគូសបញ្ជាក់ថា “ភាពមិនច្បាស់លាស់” បានក្លាយជាកត្តាកំណត់ សម្រាប់សហគ្រាសចិន ដែលកំពុងប្រតិបត្តិការ នៅក្នុងសហភាពអឺរ៉ុប៕
ប្រែសម្រួល ឈូក បូរ៉ា
