បរទេស ៖ រុស្ស៊ីបានបន្តបង្កើន ការនាំចេញត្រី និងអាហារសមុទ្រទៅកាន់ប្រទេសចិន ដោយជំរុញការលក់ក្តាមដល់កំណត់ត្រា ក្នុងទំហំទឹកប្រាក់ ១៤៨,៧ លានដុល្លារកាលពីខែមុន ។ នេះបើតាមការរាយការណ៍ របស់សារព័ត៌មាន RIA Novosti កាលពីថ្ងៃអង្គារដោយដកស្រង់ទិន្នន័យគយចិន ។
សារព័ត៌មាន RT ចេញផ្សាយនៅថ្ងៃទី២៤ ខែធ្នូ ឆ្នាំ២០២៤ បានឱ្យដឹងថា ដោយយោងតាមការវិភាគ នៅក្នុងខែវិច្ឆិកាគេបានឃើញ បរិមាណផ្គត់ផ្គង់ក្តាមប្រចាំខែ ដ៏ធំបំផុតនៅក្នុងពាណិជ្ជកម្មទ្វេភាគី របស់ប្រទេសទាំងពីរ កើនឡើង 44% នៅក្នុងលក្ខខណ្ឌប្រចាំឆ្នាំ ។
ទិន្នន័យបង្ហាញថា តម្លៃនៃការចែកចាយក្តាមបានកើនឡើងដល់ជិត ១ ពាន់លានដុល្លារ ក្នុងរយៈពេល ១១ ខែនៃឆ្នាំនេះធៀបនឹង ទំហំទឹកប្រាក់ ៩៥៤ លានដុល្លារសម្រាប់រយៈពេលដូចគ្នាក្នុងឆ្នាំ ២០២៣ ។
ប្រទេសចិនបានក្លាយជា អ្នកទិញគ្រឿងសមុទ្រដ៏ធំពីចុងបូព៌ារបស់រុស្ស៊ី បន្ទាប់ពីការដាក់ទណ្ឌកម្មរបស់ទីក្រុងប៉េកាំងលើការនាំចូលអាហារសមុទ្រពីប្រទេសជប៉ុន។ ការផ្លាស់ប្តូរនេះគឺដើម្បី ឆ្លើយតបទៅនឹងការបង្ហូរចេញរបស់ទីក្រុងតូក្យូនៃទឹកសំណល់វិទ្យុ សកម្មដែលចេញពីរោងចក្រថាមពលនុយក្លេអ៊ែរ Fukushima ដែលរងការខូចខាតចូលទៅក្នុងមហាសមុទ្រក្នុងខែសីហាឆ្នាំ ២០២៣ ។ ចំណែកប្រទេសរុស្សីក៏បានបង្វែរការនាំចេញអាហារសមុទ្រ ជាច្រើនរបស់ខ្លួនទៅកាន់អាស៊ី ដោយសារទណ្ឌកម្មរបស់លោកខាងលិច។
កាលពីខែធ្នូឆ្នាំមុន ក្រសួងរតនាគារ សហរដ្ឋអាមេរិកបានដាក់បម្រាមលើការនាំចូលត្រី សាល់ម៉ុនរបស់រុស្ស៊ី ត្រីម័ររុយ, ត្រី pollock និងក្តាម ព្រមទាំងផលិតផលអាហារសមុទ្រ ដែលទទួលបានពីការកែច្នៃរបស់ពួកគេ ។ ការដាក់ទណ្ឌកម្មដំបូង របស់សហរដ្ឋអាមេរិក លើអាហារសមុទ្ររបស់រុស្ស៊ី បានចាប់ផ្តើមនៅក្នុងខែមីនា ឆ្នាំ ២០២២ ដោយបានហាមឃាត់ផលិតផលដែលនាំចេញ ដោយផ្ទាល់ទៅសហរដ្ឋអាមេរិក ប៉ុន្តែបានអនុញ្ញាតឱ្យផលិតផលទាំងនេះផ្លាស់ទីដោយសេរីដល់អ្នកប្រើប្រាស់អាមេរិក ប្រសិនបើពួកគេត្រូវបានកែច្នៃជាលើកដំបូង នៅក្នុងប្រទេសមួយផ្សេងទៀត ៕
