បរទេស ៖ ទាហានឆ្មាំជាតិកាលីហ្វ័រញ៉ាចំនួន ៤០០ នាក់ត្រូវបានដាក់ពង្រាយ ទៅកាន់តំបន់ ដែលរងផលប៉ះពាល់ ដោយភ្លើងឆេះព្រៃក្នុងទីក្រុង ឡូសអេន ជឺលេស ដើម្បីជួយដល់កងកម្លាំងក្នុងតំបន់។
យោងតាមសារព័ត៌មាន VN EXPRESS ចេញផ្សាយនៅថ្ងៃទី១០ ខែមករា ឆ្នាំ២០២៥ បានឱ្យដឹងថា “ក្រសួង តម្រួត County Los Angeles បានស្នើសុំឆ្មាំជាតិរដ្ឋកាលីហ្វ័រញ៉ា ឱ្យជួយក្នុងការប្រយុទ្ធនឹងភ្លើងឆេះព្រៃ។ ក្នុងរយៈពេលជាង ២៤ ម៉ោងកន្លងមកនេះ សមាជិកឆ្មាំប្រហែល ៤០០ នាក់នៅទូទាំងរដ្ឋត្រូវបានដាក់ឱ្យបំពេញកាតព្វកិច្ចសកម្ម” ។ នេះបើតាមលោក Robert Luna តម្រួតតំបន់ Los Angeles County បានប្រកាសនៅថ្ងៃទី ៩ ខែមករា។
លោក Luna បាននិយាយថា អភិបាលរដ្ឋកាលីហ្វ័រញ៉ា Gavin Newsom បានយល់ព្រមលើសំណើនេះ។ តម្រួត Los Angeles County បាននិយាយថា “យើងរំពឹងថា អង្គភាពឆ្មាំជាតិនឹងមានវត្តមាននៅយប់នេះ” ដោយព្រមានថា ប៉ូលីសកំពុងល្បាតតំបន់ក្រោមការបញ្ជាជម្លៀស ហើយនឹងចាប់ខ្លួនជនណាដែលមិនមានការងារនៅទីនោះ។
ភ្លើងឆេះព្រៃបាននឹងកំពុងឆេះនៅតំបន់ប៉ាស៊ីហ្វិក Palisades តំបន់ Eaton និងតំបន់ Hurst នៃទីក្រុង ឡូសអេន ជឺលេស ចាប់តាំងពីថ្ងៃទី៧ ខែមករាមក ។ អ្នកពន្លត់អគ្គីភ័យបាននិយាយថា ការរីករាលដាលបានថយចុះ ប៉ុន្តែគ្មានភ្លើងទំហំធំណាមួយ ស្ថិតនៅក្រោមការគ្រប់គ្រងនោះទេ។
មន្ត្រីមូលដ្ឋាន និងអ្នកឧតុនិយមព្រមានថា អាកាសធាតុរាំងស្ងួត និងខ្យល់បោកបក់មិនទាន់ចប់នៅឡើយទេ។ អភិបាលក្រុង Los Angeles លោក Karen Bass បាននិយាយថា “ខ្យល់នៅតែបក់ បោកយ៉ាងខ្លាំង ។ នេះគឺជាព្យុះភ្លើង ដែលមិនធ្លាប់មាន ពីមុនមក” ៕
ប្រែសម្រួលៈ ណៃ តុលា
