បរទេស៖ ប្រធានាធិបតីប៉ាណាម៉ាលោក José Raúl Mulino កាលពីថ្ងៃពុធបានចោទប្រធានាធិបតី អាមេរិក លោក ដូណាល់ ត្រាំ ពីការនិយាយកុហកនៅពេលគាត់ បាននិយាយនៅក្នុងសុន្ទរកថា ទៅកាន់សភាថា រដ្ឋបាលរបស់លោកកំពុង “ទាមទារយក” ព្រែកជីកប៉ាណាម៉ាមកវិញ ។
យោងតាមសារព័ត៌មាន AP ចេញផ្សាយនៅថ្ងៃទី៦ ខែមីនា ឆ្នាំ២០២៥ បានឱ្យដឹងថា លោក ដូណាល់ ត្រាំ កំពុងយោងលើកិច្ចព្រមព្រៀង ដែលបានប្រកាស កាលពីថ្ងៃអង្គារសម្រាប់សម្ព័ន្ធ ដែលដឹកនាំដោយក្រុមហ៊ុនគ្រប់គ្រង ការវិនិយោគរបស់សហរដ្ឋអាមេរិក BlackRock Inc. ដើម្បីទិញភាគហ៊ុនគ្រប់គ្រង នៅក្នុងក្រុមហ៊ុន ដែលកាន់កាប់ ដោយក្រុមចិន ដែលប្រតិបត្តិការកំពង់ផែនៅចុងទាំងពីរ នៃព្រែកជីកប៉ាណាម៉ា។
ប៉ាណាម៉ា អះអាងថា ខ្លួនមានការគ្រប់គ្រងទាំងស្រុង លើព្រែកជីក ហើយប្រតិបត្តិការ របស់ក្រុមដែលមានមូលដ្ឋាន នៅទីក្រុងហុងកុងនៃកំពង់ផែនេះ មិនស្មើនឹងការគ្រប់គ្រងរបស់ចិន លើផ្លូវទឹកនោះទេ ដូច្នេះហើយ ការលក់ទៅឱ្យក្រុមហ៊ុនដែលមានមូលដ្ឋាននៅសហរដ្ឋអាមេរិក នឹងមិនតំណាងឱ្យ “ការទាមទារឡើងវិញ” នៃព្រែកជីករបស់សហរដ្ឋអាមេរិកនោះទេ។ រដ្ឋាភិបាលប៉ាណាម៉ា កាលពីថ្ងៃអង្គារបានហៅការលក់នេះថា ជាប្រតិបត្តិការឯកជន។
លោក José Raúl Mulino នៅក្នុងសារបង្ហោះទៅកាន់ X កាលពីថ្ងៃពុធ បានច្រានចោលថា កិច្ចព្រមព្រៀងនេះកើតឡើង ដោយសារតែសម្ពាធ របស់សហរដ្ឋអាមេរិក ។ លោកបានសរសេរថា “ខ្ញុំច្រានចោលក្នុងនាមប៉ាណាម៉ា និងប្រជាជន ប៉ាណាម៉ា ទាំងអស់ នូវការប្រមាថថ្មីចំពោះការពិត និងសេចក្តីថ្លៃថ្នូរ របស់យើងក្នុងនាមប្រជាជាតិមួយ”។ លោកបានចោទលោក ដូណាល់ ត្រាំ ថា “បាននិយាយកុហកម្តងទៀត” ។
លោក ត្រាំ ប្រធានាធិបតី អាមេរិក បាននិយាយអំពីការដណ្តើម យកព្រែកជីកប៉ាណាម៉ាមកវិញ ចាប់តាំងពីយុទ្ធនាការ របស់លោក ដោយលើកហេតុផលថា សហរដ្ឋអាមេរិក មិនគួរបានបង្វែរការ គ្រប់គ្រងទៅឱ្យជនជាតិប៉ាណាម៉ានោះទេ ហើយថាសហរដ្ឋអាមេរិក កំពុងត្រូវបានគិតថ្លៃលើស សម្រាប់ការប្រើប្រាស់ព្រែកជីកនេះ ៕
ប្រែសម្រួលៈ ណៃ តុលា
