បរទេស៖ ក្រសួងពាណិជ្ជកម្មអាមេរិកបានប្រកាសពីផែនការដាក់ពន្ធរហូតដល់ ៣.៥២១ភាគរយ លើការនាំចូលបន្ទះស្រូបពន្លឺព្រះអាទិត្យ ឬ សូឡា ពីប្រទេសចំនួនបួននៅអាស៊ីអាគ្នេយ៍ រួមមាន ប្រទេសកម្ពុជា ថៃ ម៉ាឡេស៊ី និងវៀតណាម។
យោងតាមសារព័ត៌មាន BBC ចេញផ្សាយនៅថ្ងៃទី២២ ខែមេសា ឆ្នាំ២០២៥ បានឱ្យដឹងថា រឿងនេះបានកើតឡើងបន្ទាប់ពីការស៊ើបអង្កេត ដែលបានចាប់ផ្តើមកាលពីមួយឆ្នាំមុន នៅពេលដែលអ្នកផលិតឧបករណ៍ ថាមពលពន្លឺព្រះអាទិត្យធំៗជាច្រើន បានស្នើសុំរដ្ឋបាលប្រធានាធិបតី Joe Biden ដើម្បីការពារប្រតិបត្តិការនៅសហរដ្ឋអាមេរិករបស់ពួកគេ។
ការយកពន្ធដែលបានស្នើឡើង ដែលសំដៅទៅលើក្រុមហ៊ុនក្នុងប្រទេសកម្ពុជា ថៃ ម៉ាឡេស៊ី និងវៀតណាម គឺជាការឆ្លើយតបទៅនឹងការចោទប្រកាន់ អំពីការឧបត្ថម្ភធនពីប្រទេសចិន និងការលក់បង្ខូចថ្លៃដោយអយុត្តិធម៌ នៅក្នុងទីផ្សារសហរដ្ឋអាមេរិក។
ទីភ្នាក់ងាររដ្ឋាភិបាលសហរដ្ឋអាមេរិកដាច់ដោយឡែកមួយ គឺគណៈកម្មការពាណិជ្ជកម្មអន្តរជាតិ នឹងឈានដល់ការសម្រេចចិត្តចុងក្រោយ ស្តីពីពន្ធថ្មីនៅក្នុងខែមិថុនា។
ពន្ធប្រឆាំងការបង្រ្កាប និងការប្រឆាំងការលក់បង្ខូចថ្លៃ ដូចដែលពន្ធទាំងនេះត្រូវបានគេស្គាល់ មានភាពខុសប្លែកគ្នារវាងក្រុមហ៊ុន និងប្រទេសដែលផលិតផលរបស់ពួកគេត្រូវបានផលិត។
ក្រុមហ៊ុននាំចេញឧបករណ៍ពន្លឺព្រះអាទិត្យមួយចំនួននៅក្នុងប្រទេសកម្ពុជា ប្រឈមនឹងពន្ធខ្ពស់បំផុតចំនួន ៣.៥២១ភាគរយ ដោយសារតែអ្វីដែលត្រូវបានគេមើលឃើញថា ជាកង្វះកិច្ចសហប្រតិបត្តិការជាមួយនឹង ការស៊ើបអង្កេតរបស់ក្រសួងពាណិជ្ជកម្មអាមេរិក។
ផលិតផលដែលផលិតនៅប្រទេសម៉ាឡេស៊ី ដោយក្រុមហ៊ុនផលិតរបស់ចិន Jinko Solar បានប្រឈមមុខនឹងពន្ធទាបបំផុតមួយចំនួន ដែលមានត្រឹមតែជាង ៤១ភាគរយ ប៉ុណ្ណោះ។ ក្រុមហ៊ុន Trina Solar ដែលមានមូលដ្ឋាននៅប្រទេសចិនមួយផ្សេងទៀត ប្រឈមនឹងពន្ធ ៣៧៥ភាគរយ សម្រាប់ផលិតផលដែលខ្លួនផលិតនៅក្នុងប្រទេសថៃ។
ក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុនចិនជាច្រើនបានផ្លាស់ប្តូរ ប្រតិបត្តិការទៅកាន់អាស៊ីអាគ្នេយ៍ ក្នុងគោលបំណងជៀសវាងការយកពន្ធ ដែលត្រូវបានដាក់ចាប់តាំងពីការចាប់ផ្តើមអាណត្តិដំបូង របស់ប្រធានាធិបតីអាមេរិក Donald Trump៕
ប្រែសម្រួលៈ ណៃ តុលា
