បរទេស៖ ឯកអគ្គរដ្ឋទូតសហភាពអឺរ៉ុប ប្រចាំនៅប្រទេសចិន បាននិយាយនៅថ្ងៃព្រហស្បតិ៍នេះថា កំណើនភាពតានតឹង រវាងសហរដ្ឋអាមេរិក និងប្រទេសចិន គឺជាបញ្ហា និងធ្វើឲ្យប៉ះពាល់ ដល់សហប្រតិបត្តិការ ពហុជាតិដ៏ទូលំទូលាយ ដែលត្រូវការជាចាំបាច់ ដើម្បីដោះស្រាយ ជាមួយការរាតត្បាតឆ្លង នៃមេរោគកូរ៉ូណា។
លោក Nicolas Chapuis បាននិយាយប្រាប់អ្នកសារព័ត៌មាន នៅក្នុងអំឡុងសន្និសីទកាសែតមួយថា ប្រទេសចិន កំពុងស្ថិតក្នុងតួនាទីដ៏សំខាន់មួយ ដើម្បីជួយកាត់បន្ថយភាពតានតឹង និងធ្វើកំណែទម្រង់ សេដ្ឋកិច្ចខ្លួនបន្ថែមទៀត ដើម្បីជៀសវាងការបំផ្លាញ ដល់សង្វាក់ផ្គត់ផ្គង់សកល ការបំបែកសេដ្ឋកិច្ចធំៗ និងកំណើនៃការគាំពារនិយម។
តាមសេចក្តីរាយការណ៍ លោក បានមានប្រសាសន៍ដូច្នេះថា “យើងកំពុងមើលឃើញកម្រិតខ្ពស់ នៃភាពតានតឹង លើផ្នែកយុទ្ធសាស្ត្រ សេដ្ឋកិច្ចនិងនយោបាយ ដែលកើតខ្លាំងឡើង ពីមួយថ្ងៃទៅមួយថ្ងៃ ហើយតាមមតិយោបល់របស់យើង គឺថា ភាពតានតឹងនោះ គ្មានផលប្រយោជន៍ ចំពោះស្មារតីសហការគ្នា ដែលយើងត្រូវការ ជាចាំបាច់នាពេលបច្ចុប្បន្ននេះទេ”៕ ប្រែសម្រួល៖ប៉ាង កុង
