ប្រធាន IMF ៖ AI អាចជាប្រភព នៃភាពខុសគ្នាក្នុងប្រទេស និងនៅទូទាំងប្រទេសក្នុងពិភពលោក
វ៉ាស៊ីនតោន៖ នាយកគ្រប់គ្រង មូលនិធិរូបិយវត្ថុអន្តរជាតិ (IMF) លោកស្រី Kristalina Georgieva បានឧ្យដឹងថា បញ្ញាសិប្បនិមិត្ត (AI) អាចបង្កើនផលិតភាព ប៉ុន្តែវាក៏អាចជាប្រភព នៃភាពខុសប្លែកគ្នានៅក្នុងប្រទេស និងនៅទូទាំងប្រទេសផ្សេងទៀតផងដែរ។
ដោយកត់សម្គាល់ថា ការរីកដុះដាល នៃការវិនិយោគ AI កំពុងនាំមកនូវ “សុទិដ្ឋិនិយមមិនគួរឱ្យជឿ” លោកស្រី Georgieva បានប្រាប់សន្និសីទសារព័ត៌មានក្នុងអំឡុង កិច្ចប្រជុំប្រចាំឆ្នាំ២០២៥ នៃក្រុមធនាគារពិភពលោក និង IMF ថា AI នឹងរួមចំណែកដល់កំណើនពិភពលោក នៅកន្លែងណាមួយរវាង ០.១% និង ០.៨% ដែល “មានសារៈសំខាន់” ។
នៅក្នុងទស្សនវិស័យសេដ្ឋកិច្ចពិភពលោកចុងក្រោយបំផុតរបស់ខ្លួន ដែលបានចេញផ្សាយកាលពីថ្ងៃអង្គារ IMF បានបង្កើនការព្យាករណ៍កំណើនសេដ្ឋកិច្ចសកលរបស់ខ្លួន សម្រាប់ឆ្នា២០២៥ បន្តិចទៅ ៣.២ភាគរយ ខណៈដែលការចង្អុលបង្ហាញថា កត្ដាពន្ធកំពុងធ្វើឱ្យមានការថយចុះនូវចក្ខុវិស័យកំណើនបន្ថែមទៀត។ កំណើនសេដ្ឋកិច្ចពិភពលោកត្រូវបានព្យាករណ៍ថា នឹងធ្លាក់ចុះមកត្រឹម ៣.១ភាគរយនៅឆ្នាំ២០២៦។
លោកស្រី Georgieva បានលេីកឡេីងថា “យើងជាប់គាំងនៅក្នុង កំណើនប្រហែល ៣ភាគរយនៅពេលនេះ។ ហើយប្រសិនបើយើងទាញយកការ ជំរុញនៃកំណើនបែបនោះ (ពី AI) នោះវានឹងមានសារៈសំខាន់ខ្លាំង ណាស់សម្រាប់ពិភពលោក” ។
លោកស្រីបានកត់ សម្គាល់ថា IMF បានបង្កើត សន្ទស្សន៍ត្រៀម AI ដែលដាក់ចំណាត់ថ្នាក់ប្រទេស លើលក្ខណៈវិនិច្ឆ័យ ចំនួនបួន៖ ហេដ្ឋារចនាសម្ព័ន្ធឌីជីថល ជំនាញទីផ្សារការងារ ការច្នៃប្រឌិត និងរបៀបដែលវាជ្រាបចូល៕
ប្រែសម្រួល ឈូក បូរ៉ា
