វ៉ាស៊ីនតោន៖ ក្រសួងការបរទេស សហរដ្ឋអាមេរិក បានឲ្យដឹងថា ប្រេសិតពិសេស របស់សហរដ្ឋអាមេរិក សម្រាប់ប្រទេសកូរ៉េខាងជើង លោក Mark Lambert បានធ្វើដំណើរទៅកាន់ទីក្រុងមូស្គូ នៅសប្តាហ៍នេះ ដើម្បីជួបជាមួយមន្រ្តីរុស្ស៊ី និងពិភាក្សាអំពីកិច្ចខិតខំប្រឹងប្រែង ក្នុងការរុះរើកម្មវិធីអាវុធនុយក្លេអ៊ែរ របស់កូរ៉េខាងជើង។
អ្នកនាំពាក្យ របស់នាយកដ្ឋានបានលើកឡើងថា Mark Lambert នឹងធ្វើទស្សនកិច្ច នៅរដ្ឋធានីរុស្ស៊ី ចាប់ពីថ្ងៃពុធដល់ថ្ងៃសៅរ៍ ហើយក៏នឹងចូលរួមក្នុងសន្និសីទក្រុងម៉ូស្គូ ផងដែរ ក្នុងអំឡុងពេលស្នាក់នៅរបស់លោក។
ការចូលរួមរបស់លោក Mark Lambert ត្រូវបានគេរាយការណ៍កាលពីមុន ដែលជំរុញឱ្យមានការរំពឹងទុក នៃកិច្ចប្រជុំដែលអាចកើតមាន រវាងមន្ត្រីសហរដ្ឋអាមេរិក និងអ្នកការទូតកូរ៉េខាងជើងម្នាក់ ដែលចូលរួមក្នុងព្រឹត្តិការណ៍នេះផងដែរ៕ ដោយ៖ ឈូក បូរ៉ា
