ហ្វីលីពីន គ្រោងនឹងកាត់បន្ថយ ការធ្វើការមកត្រឹម៤ថ្ងៃ១សប្តាហ៍ ដោយសារតែប្រេងឥន្ធនៈឡើងថ្លៃ
បរទេស៖ ក្រសួងថាមពល របស់ប្រទេស ហ្វីលីពីន បានពិភាក្សាកាលពីថ្ងៃព្រហស្បតិ៍ អំពីវិធានការរបស់រដ្ឋាភិបាល ដើម្បីកាត់បន្ថយផលប៉ះពាល់ នៃការកើនឡើងនៃតម្លៃប្រេងដោយសារតែវិបត្តិអ៊ីរ៉ង់ រួមទាំងការដំឡើងថ្លៃប្រេងឥន្ធនៈជាបន្តបន្ទាប់ ការកាត់បន្ថយពន្ធលើការប្រើប្រាស់ និងធ្វើការបួនថ្ងៃក្នុងមួយសប្តាហ៍។
យោងតាមសារព័ត៌មាន ABS CBN ចេញផ្សាយកាលពីថ្ងៃទី៥ ខែមីនា ឆ្នាំ២០២៦ថា លោកស្រី Sharon Garin រដ្ឋមន្ត្រីក្រសួងថាមពលបាននិយាយថា ក្រុមហ៊ុនប្រេងក្នុងស្រុកបានធានា ចំពោះរដ្ឋាភិបាលថា ការនាំចូលប្រេងឥន្ធនៈកំពុងដំណើរការរួចហើយ ដោយសារតែមានការភ័យខ្លាច អំពីកង្វះខាតដែលអាចកើតមាន ។ នាយកប្រតិបត្តិ DOE ម្នាក់បានព្រមានពីមុនថា តម្លៃប្រេងឥន្ធនៈអាចកើនឡើងរហូតដល់ ១០ ប៉េសូក្នុងមួយលីត្រ ដោយផ្អែកលើការជួញដូរនៅ Mean of Platts Singapore។
ការអំពាវនាវរបស់រដ្ឋាភិបាលសម្រាប់ការដំឡើងថ្លៃជាបន្តបន្ទាប់ ក៏ដូចជាការបញ្ចុះតម្លៃ ត្រូវបានពិភាក្សាក្នុងអំឡុងពេលកិច្ចប្រជុំបន្ទាន់ថ្ងៃពុធ ជាមួយឧស្សាហកម្មប្រេង ដែលជាលើកទីពីរក្នុងមួយសប្តាហ៍។
លោកស្រីបានមានប្រសាសន៍ថា “យើងនឹងកំណត់នៅចុងសប្តាហ៍ (ការកើនឡើងជាបន្តបន្ទាប់) យើងក៏នឹងប្រកាសនៅពេលនោះដែរ ប្រសិនបើមិនមានការកើនឡើង ដោយបន្ថែមថា ការដំឡើងថ្លៃជាបន្តបន្ទាប់គឺជាការស្ម័គ្រចិត្ត។
ប្រែសម្រួល: ណៃ តុលា
