វៀតណាម នឹងសាងសង់រោងចក្រ នុយក្លេអ៊ែរដំបូងគេ បន្ទាប់ពីចុះកិច្ចព្រមព្រៀង ជាមួយរុស្ស៊ី
បរទេស៖ រដ្ឋាភិបាលវៀតណាម និង រុស្ស៊ី កាលពីថ្ងៃទី២៣ ខែមីនា បានចុះហត្ថលេខាលើកិច្ចព្រមព្រៀង ស្តីពីកិច្ចសហប្រតិបត្តិការ ក្នុងការសាងសង់រោងចក្រ ថាមពលនុយក្លេអ៊ែរនៅលើទឹកដីវៀតណាម ក្នុងអំឡុងពេលដំណើរទស្សនកិច្ច របស់នាយករដ្ឋមន្ត្រី ផាំ មិញ ឈីញ ទៅកាន់ទីក្រុងមូស្គូ ប្រទេសរុស្ស៊ី។
យោងតាមសារព័ត៌មាន VN Express ចេញផ្សាយនៅថ្ងៃទី២៤ ខែមីនា ឆ្នាំ២០២៦ថា ក្នុងអំឡុងពេលនៃកិច្ចពិភាក្សារបស់ពួកគេនៅទីក្រុងមូស្គូ នាយករដ្ឋមន្ត្រី ផាម មិញឈីញ និងសមភាគី រុស្ស៊ី លោក មីខាអ៊ីល មីស៊ូស្ទីន បានស្វាគមន៍ ចំពោះការចុះហត្ថលេខាលើកិច្ច ព្រមព្រៀងសហប្រតិបត្តិការរោងចក្រ ថាមពលនុយក្លេអ៊ែរ ដោយចាត់ទុកថា នេះជាជំហានដ៏សំខាន់មួយក្នុងកិច្ច សហប្រតិបត្តិការទ្វេភាគីក្នុងវិស័យ ថាមពលនុយក្លេអ៊ែរសម្រាប់គោលបំណងសន្តិភាព ហើយជឿជាក់ថា នេះនឹងក្លាយជាគម្រោងនិមិត្តរូបថ្មី មួយសម្រាប់មិត្តភាពរវាងវៀតណាម និងរុស្ស៊ី។
ភាគីទាំងពីរក៏បានវាយតម្លៃខ្ពស់ចំពោះការចុះហត្ថលេខាលើកិច្ចព្រមព្រៀងសហប្រតិបត្តិការបន្ថែមទៀតក្នុងវិស័យថាមពល-ប្រេង និងឧស្ម័ន និងការដឹកជញ្ជូនរវាងអាជីវកម្ម នៃប្រទេសទាំងពីរក្នុងក្របខ័ណ្ឌនៃដំណើរទស្សនកិច្ច ដោយហេតុនេះអនុវត្តពិធីសារ និងកិច្ចព្រមព្រៀងអន្តររដ្ឋាភិបាល ដែលបានចុះហត្ថលេខារួចហើយប្រកបដោយប្រសិទ្ធភាព ដែលរួមចំណែកដល់ការធានា សន្តិសុខថាមពលក្នុងបរិបទបច្ចុប្បន្ន។
វៀតណាម និងរុស្ស៊ីបានទទួលស្គាល់សមិទ្ធផលក្នុងវិស័យថាមពល និងកិច្ចសហប្រតិបត្តិការប្រេង និងឧស្ម័នរវាងវៀតណាម និងរុស្ស៊ីក្នុងប៉ុន្មានឆ្នាំថ្មីៗនេះ រួមទាំងការចូលរួម និងការរួមចំណែកនៃការបណ្តាក់ទុនរួមគ្នាពីប្រទេសទាំងពីរក្នុងវិស័យនេះ។
ភាគីទាំងពីរបានយល់ព្រមសិក្សា និងពង្រីកកិច្ចសហប្រតិបត្តិការក្នុងវិស័យថាមពលថ្មី ថាមពលស្អាត និងថាមពលកកើតឡើងវិញក្នុងពេលឆាប់ៗនេះ ដោយរួមចំណែកដល់ការផ្លាស់ប្តូរបៃតង និងការអភិវឌ្ឍប្រកបដោយចីរភាព៕
ប្រែសម្រួលៈ ណៃ តុលា
